गोक्सी महंगो भोज, एकपटकको डिनरमा ३ करोड ७२ लाख खर्च !

२१ माघ, काठमाडौं । संसारमा कहिलेकाँही  अचम्मका घटनाहरू हुने गर्छन्, फरक खालका यस्ता घटनाले मानिसको ध्यान तान्ने गर्छ । सुन्दा र यो समाचार पढ्दा तपाईँलाई पनि अचम्मै लाग्न सक्छ । कति महङ्गो भोज !

चर्चित टर्किश सेफ सल्ट बेइ उर्फ नुसरत गोक्सीको एउटा पोस्ट यतिबेला सामाजिक सञ्जालमा भाइरल बनेको छ । रेष्टुराँमा एकपटक डिनर गरेको बिल ३ करोड ७२ लाख आएपछि गोक्सीले एउटा लामो बिलको फोटो इन्स्टाग्राममा पोस्ट गरेका छन् । उनको यो पोस्टले यतिबेला अन्तर्राष्ट्रिय सञ्चारमाध्यमहरूमा समेत निकै प्राथमिकता पाइरहेको छ ।

घटना दुबईको हो । गोक्सीले काम गर्ने रेष्टुराँमा केही दिनअघि एउटा समूह डिनर गर्न आएको थियो । डिनरपछिको बिल ६ लाख १५ हजार ६५ दिराम अर्थात नेपाली ३ करोड ७२ लाख आयो । बिलमा अर्डर गरिएको खानेकुराका परिकार र पेय पदार्थको मूल्य छुट्टाछुट्टै लेखिएको छ ।

रोचक प्रंसग त के छ भने,त्यो समूहले रेष्टुराँका कर्मचारीलाई टिप्सवापत् मात्रै नेपाली ३२ लाख ६६ हजार रूपैयाँ दिएको छ । त्यो समूहले बिलको फोटो र भिडियो शेयर गर्दै लेखेको पनि छ, 'पैसा आउँछ,पैसा जान्छ ।'

यो घटनालाई लिएर केही प्रयोगकर्ताले परिकारको महंगो मूल्यप्रति असन्तुष्टि र आक्रोश पोखेका छन् । कतिपयले डिनर गर्ने समूहलाई कटाक्ष गर्दै पैसाको बर्बादी भनेका छन् ।