आरती साहकी आमा र भाई सिंहदरबार गेटबाट पक्राउ

२२ माघ, काठमाडौं । प्रहरीले आरती साहकी आमा निर्मला साह र भाइ प्रेम साहलाई पक्राउ गरेको छ । उनीहरु सरकारको ध्यानाकर्षण गराउन सिंहदरवार गएका थिए । छोरी आरतीको हत्या भएको र प्रहरीकै सहयोगमा दोषीहरू उम्काउने काम भएको भन्दै उनीहरु सोमबार दिउँसो सिंहदरबार गेटमा पुगेका थिए । 

प्रहरीले उनीहरूलाई सिंहदरबार प्रवेशमा रोक लगाएको भन्दै उनीहरूलाई भ्यानमा राखेर लगेको छ । जनकपुरकी आरती साहको मृत्यु प्रकरणमा प्रहरीको कमजोरीका कारण आफूहरुले न्याय नपाएको भन्दै आरतीका आमाबुवासहित उनका परिवार २३५ दिनदेखि धर्नामा बसिरहेका छन् । यसअघि माइतीघरमा धर्ना बसिरहेका उनीहरुलाई सरकारले निषेधाज्ञा घोषणा गरेर हटाएयता उनीहरुले शान्तिवाटिकामा बसेर धर्ना दिइरहेका छन् ।