सिद्धार्थ बैंकले जोगाउन सकेन ताज, वितरण योग्य मुनाफा ऋणात्मक, निक्षेप घट्दै

२५ माघ, काठमाडौं । मारवाडी बैंकका रुपमा परिचित सिद्धार्थ बैंकको वित्तीय अवस्था दिन प्रतिदिन बिग्रँदो क्रममा रहेको छ । बैंकले आफ्ना शेयरधनीलाई यसपटक ५ प्रतिशत नगद लाभांश पनि दिन सकेन । लगानीकर्तालाई यो लाभांशले हाँस्नु कि रुनु बनाएको छ ।

बैंकको वितरण योग्य मुनाफा ऋणात्मक रहेको छ भने बैंकको निक्षेप संकलन पनि दयनीय रुपमा घटेको छ । असार मसान्त र अहिले पुष मसान्तलाई दाँजेर हेर्दा बैंकको निक्षेप १ दशमलव  १५ प्रतिशतले घटेको छ ।  

बैंकको संचालक समितिको अध्यक्षमा  मनोज कुमार केडिया रहेका छन् । बैंकको संचालक समितिका अन्य सदस्यमा नरेन्द्र कुमार अग्रवाल, राहुल अग्रवाल, दिनेश शंकर पालिखे, अङ्कित केडिया, मीना कुमारी सैंजु रहेका छन् ।

त्यस्तै बैंकको उच्च व्यवस्थापनमा सीईओ सुन्दर प्रसाद कडेलदेखि डेपुटी सीईओमा रामेश्वर प्रसाद बस्याल र सहायक सीईओमा शेर बहादुर बुढाथोकी रहेका छन् । यसैगरी बैंक व्यवस्थापनका विभागीय कर्मचारीहरुमा अर्जुनभद्र खनाल, सिर्जनकृष्ण मल्ल, सुरेशराज महर्जन, प्रसन्न खडका, शैलजा ज्ञवाली, मनोहर केसी र प्रदीप पन्त रहेका छन् ।

कस्तो आयो आर्थिक वर्ष २०८०-८१ को दोस्रो त्रैमासको वित्तीय प्रतिवेदनः
खुद मुनाफाः
चालू आर्थिक वर्षको दोस्रो त्रैमास अर्थात् ६ महिनाको अवधिमा बैंकले १ अर्ब १३ करोड बराबर खुद मुनाफा गरेकोमा गत आर्थिक वर्षको दोस्रो त्रैमाससम्ममा बैंकले १ अर्ब १६ करोड बराबर खुद मुनाफा गरेको थियो । यसरी खुद मुनाफामा २ दशमलव १० प्रतिशतको गिरावट आएको छ ।

खुद व्याज आम्दानी र संचालन मुनाफाः
गत आर्थिक वर्षको दोस्रो त्रैमासमा कम्पनीले ४ अर्ब १ करोड बराबर खुद व्याज आम्दानी गरेकोमा चालू आर्थिक वर्षको दोस्रो त्रैमाससम्म कम्पनीले ४ अर्ब १० करोड खुद ब्याज आम्दानी गरेको छ । यसरी खुद ब्याज आम्दानीमा २ दशमलव  १४ प्रतिशतको वृद्धि भएको छ । त्यस्तै, संचालन मुनाफामा शून्य दशमलव १० प्रतिशतको गिरावट हुँदै १ अर्ब ६५ करोड ५५ लाख पुगेको छ । गत वर्षको दोस्रो त्रैमासमा कम्पनीले १ अर्ब ६५ करोड ७२ लाख संचालन मुनाफा गरेको थियो ।

प्रतिशेयर आम्दानी:
कम्पनीको वार्षिक प्रतिशेयर आम्दानी १६ रूपैयाँ १८ पैसा हुन आउँछ । एक वर्ष अघि प्रतिशेयर आम्दानी १६ रूपैयाँ ५३ पैसा थियो । समिक्षा अवधिमा प्रतिशेयर आम्दानी २ दशमलव  १२ प्रतिशतले घटेको छ ।
वितरणयोग्य मुनाफा:
कम्पनीको वितरण योग्य मुनाफा ३० करोड ४५ लाख ऋणात्मक रहेको छ । गत आर्थिक वर्ष वितरण योग्य मुनाफा ९ करोड ६५ लाख थियो । समीक्षा अवधिमा वितरण योग्य मुनाफा ४१५ दशमलव ३६ प्रतिशतले घटेको छ । 
निक्षेप, कर्जाः
कम्पनीले चालू आर्थिक वर्षको दोस्रो त्रैमाससम्म २ खर्ब २१ अर्ब निक्षेप संकलन गरी १ खर्ब ९० अर्ब कर्जा प्रवाह गरेको छ । आर्थिक वर्ष २०७९-८० को असार मसान्त र अहिलेको तथ्याङ्कलाई दाँजेर हेर्दा कम्पनीको निक्षेप संकलनमा १ दशमलव  १५ प्रतिशतले गिरावट आएको छ भने कर्जा प्रवाह ३ दशमलव  ७५ प्रतिशतले वृद्धि भएको छ ।

जगेडा कोष, संचित मुनाफाः
जगेडा कोष १३ दशमलव ४१ प्रतिशतले बढेर ११ अर्ब ९६ करोड पुगेको छ भने संचित मुनाफा १४५ दशमलव ८९ प्रतिशतले घटेर ३० करोड ४५ लाख रूपैयाँ ऋणात्मक छ ।
किताबी मूल्य:
कम्पनीको किताबी मूल्य (प्रतिशेयर नेट्वर्थ) १८२ रूपैयाँ ७८ पैसा आउँछ ।
निष्क्रिय कर्जाः
कम्पनीको खराब कर्जा २ दशमलव ५६ प्रतिशत रहेको छ । गत आर्थिक वर्षको दोस्रो त्रैमासमा खराब कर्जा २ दशमलव ८७ प्रतिशत थियो ।

आधार ब्याजदर, स्प्रेडदरः
बैंकको आधार ब्याजदर केही घट्दै ९ दशमलव २८ प्रतिशत पुगेको छ । स्प्रेडदर ३ दशमलव ९९ प्रतिशत छ । गत आर्थिक वर्ष सोही अवधिमा स्प्रेडदर ४ दशमलव २२ प्रतिशत थियो ।
ठुला शेयरधनीः
आर्थिक वर्ष २०७९-८० को वार्षिक प्रतिवेदन अनुसार कम्पनीको सबैभन्दा ठूलो शेयरधनीमा प्रुडेन्सियल इन्भेस्टमेन्ट कं. प्रा. लि. रहेको छ । प्रुडेन्सियल इन्भेस्टमेन्ट कम्पनीको ३ दशमलव २३ प्रतिशत शेयर स्वामित्व रहेको छ ।

लाभांश इतिहासः
कम्पनीले आर्थिक वर्ष २०७९-८० मा ४ दशमलव  २१ प्रतिशत नगद लाभांश दिएको छ ।