कांग्रेस नगर सभापति पाण्डेलाई हिरासतमा थुन्ने डीएसपीको धम्की

२ फागुन, वालिङ् (स्याङजा) । यति बेला वालिङवासी त्राहित्राही छन् । दैनिक जसो हुने चोरीका घटनाले वालिङवासी त्राहित्राही बनेका हुन् । वालिङ नगरवासीको शान्ति सुरक्षाको जिम्मा पाएका वडा प्रहरी कार्यालयका प्रमुख डीएसपी इकवाल हवारीले राजर्षि शैली देखाएको भन्दै स्थानीय झन् त्राहिमाम छन् । शान्ति सुरक्षाको याचनाका लागि कार्यालय पुग्ने सर्वसाधारण नागरिकलाई उल्टै थर्काउने, धम्क्याउने र तर्साउने डीएसपी हवारीको दैनिक कार्यसम्पादन नै बनेको छ ।

मंगलबार वालिङ नगरपालिका १३ मा भएको चोरीको घटनाबारे वडा कार्यालयमा डेलिगसन गएका राजनीतिक दलका नेता, पत्रकार, बुद्धिजीवी र स्थानीयले शान्ति सुरक्षा बारे प्रश्न गर्दा डीएसपी हवारीले आफूलाई उच्च ओहोदाका मान्छेका रुपमा प्रस्तुत गरेको नेपाली कांग्रेस वालिङ नगर समितिका सभापति नेत्रप्रसाद पाण्डेले बताए । सभापति पाण्डेले भने, ‘डीएसपीसँग वालिङका आम नागरिक हैरान छन् । वडा प्रहरी कार्यालयद्वारा शान्ति, सुरक्षा र न्याय पाउने आशा मारेका छन् ।’ नागरिकको सुरक्षा जस्तो संवेदनशील विषयमा आफूले कुरा उठाउँदा हिरासत कक्षमा थुन्ने धम्कीसमेत दिएको पाण्डेले बताए । कार्यालय परिसरमा उपस्थितलाई अभद्र व्यवहार गरेपछि नालायक प्रहरी भन्दै डीएसपी हवारीको चर्को विरोध भएको थियो । 

घटनाबारे डीएसपी हवारीसँग बुझ्दा केही तत्वहरुका कारण हिजो वातावरण अर्कै बनेको बताए । उनले भने, ‘केही मानिसहरू मिलाउने भन्दा पनि वातावरण धमिल्याउने उद्देश्यले आए । उनीहरूकै कारण केही असहज पक्कै भएको हो ।’
उता शृङ्खलाबद्ध रुपमा हुँदै आएको चोरीको घटनाको विषयमा अनुसन्धान भइरहेको उनले बताए । आफूहरूको हजारौं राम्रो काम एउटा नराम्रो कामले ओझेलमा परेको डीएसपी हवारीले दुखेसो व्यक्त गरे । ‘२४ सै घण्टा डियूटी गर्दा पनि घट्ने घटना घटिहाल्छ । त्यही घटनाले प्रहरीका तमाम राम्रा काम आउँदैनन्,’ उनले थपे । 

जिल्ला प्रशासन कार्यालय स्याङजाका सहायक प्रमुख जिल्ला अधिकारी दीपक पौडेलले जिल्लाको सुरक्षा संयन्त्र बैठक बस्ने तयारी भइरहेको बताए । संयन्त्रको बैठकबाट थप सुरक्षा व्यवस्था मिलाइने उनले जानकारी दिए । 

गत माघ १५ गते वालिङ ८ डुम्रीकोटबाट रातो स्कुटर चोरी भएसँगै वालिङमा चोरीको घट्ना ह्वात्तै बढेको छ । वालिङ २ का नुमाकान्त गैह्रेको रातो होण्डा डियो स्कुटर डुम्रीकोटबाट हराएको एक महिना बित्दा पनि हालसम्म फेला परेको छैन । स्कुटरधनी गैह्रेले खोजतलासका लागि वडा प्रहरी कार्यालय वालिङमा ठाडो निवेदन हालेका थिए । तर, हराएको स्कुटरबारे हालसम्म कुनै अत्तोपत्तो छैन । 

गत आइतबार वालिङ १३ बायाँटारी झोलुङ्गे बजारमा एकै रातमा १० घरमा तोडफोडका साथै धनमाल चोरी भएको छ । एकैरातमा धेरै घरहरू फोरिनु र चोरी हुनुले प्रहरीको सुरक्षा व्यवस्थापनलाई कडा चुनौती दिएको छ ।

माघ २६ गते बिहारथोकः
गत माघ २६ गते वालिङ १० बिहारथोकमा टिक बहादुर गुरुङको घरबाट सुनको मंगलसुत्र २.५ तोला, सुनको औठी २ तोला, सुनको सादा रिङ १ तोला, सुनको चुरा १.५ तोला, सुनको चन्द्रमा २५ लाल बराबरका, सुनको लकेट २ थान २५/२५ लाल बराबरकाे नगद ५० हजार रूपैयाँ र १५ इन्चको २ थान फलामको खुकुरी चोरी भएको जिल्ला प्रहरी कार्यालयले जनाएको छ ।

माघ २८ गते झोलुङ्गे
१. वालिङ १३ झोलुङ्गेका दिलुराम गैरेले संचालन गरेको राजन किराना पसलको ताल्चा फुटाई बाकस भित्र रहेको नगद ७५ हजार चोरी गरेको ।
२. जगन्नाथ पाठकले संचालन गरेको प्रशंसा मदिरा पसलको छतबाट गई कोठाको ताल्चा फुटाई उक्त पसल भित्र रहेको, ओल्डदरबार ब्हस्की ६ (फुल)बोतल, खुकुरी रम ४ (फुल) बोतल,सीसी क्यामराको हार्ड डिस्क, कम्प्युटरसहित थान १/१ चोरी गरेको भएको छ ।
३. जगन्नाथ पाठकको घर भाडामा लिई दण्डपानी गैरेले संचालन गरेको अर्लुङ भगवती किराना पसलमा छतबाट गई कोठाको ताल्चा फुटाई उक्त पसल भित्र रहेको नगद २० हजार चोरी गरेको छ ।
४. भगवती गैरेले संचालनको गरेको समिर सिलाई तथा व्युटी पार्लरको ताल्चा फुटाई उक्त पार्लर भित्र रहेको नगद ३ हजार चोरी गरेको ।
५. अनिता पाठकले संचालन गरेको विपिन फेन्सी पसलको ताल्चा फुटाई नगद घ हजार चोरी गरेको ।
६. जीवन ज्योती बोर्डिङ स्कुलको ४ वटा कोठाको ताल्चा फुटाएको, चोरी नभएको ।
७. घडी बहादुर गुरुङको घरबाट सुनको सिक्री १/५० तोला एकथान, सुनको औँठी आधी तोला एकथान, सुनको चन्द्र हार आधी तोला एकथान, सुनको तिलहरी आधी तोला एकथान, सुनको फुलि २५ लाल एकथान र नगद २० हजार रूपैयाँ चोरी गरेको । 
८. दुर्गा राम गुरुङको घरबाट नगद ५ हजार रूपैयाँ चोरी गरेको । 
९. नेत्र बहादुर गुरुङको घरको साइकल चोरी गरेको । 
१०. सुकमान गुरुङको घरको ताला फोडेको तर चोरी नभएको ।

आइतबार मात्रै ४ तोला ७५ लाल सुन र १ लाख २६ हजार नगद र १० बोतल ब्राण्डेड रक्सी, हार्ड डिस्क, कम्प्युटर चोरी भएको जिल्ला प्रहरी कार्यालयले जनाएको छ ।

फागुन १ मा मन्दिरमा चोरी
यस्तै गरी मंगलबार राति वालिङ १३ मोदी खोलामा रहेको शिव पार्वती मन्दिरमा पनि चोरी भएको प्रहरीले जनाएको छ । 

पछिल्लो एकवर्षमा वालिङ नगरभित्र मात्रै करिब २५ वटा चोरीका घट्ना घटेका छन् । प्रहरीको फितलो अनुसन्धानका कारण चोरीमा संलग्नहरु अझै पनि पक्राउ परेका छैनन् ।