राजनीतिक दलका गतिविधि आयोगलाई जानकारी गराउन १५ बुँदे निर्देशन

३ फागुन, काठमाडौं । निर्वाचन आयोगले राजनीतिक दलहरुलाई दलमा भएका गतिविधि जानकारी गराउन निर्देशन दिएको छ । निर्वाचन आयोगमा दर्ता भएका सबै राजनीतिक दलहरूलाई १५ बुँदे निर्देशन दिँदै दलको नाम, विधान, नियम, छाप, झण्डा वा चिन्हमा परिवर्तन भए त्यसको जानकारी गराउन भनेको छ । 

बिहीबार बसेको आयोगको बैठकले राजनीतिक दल सम्बन्धी ऐन, २०७३ को दफा ५७ बमोजिम पार्टी कमिटी, पद, पदाधिकारी हेरफेर, सदस्यता लगायतका विषयमा निर्देशन दिएको हो ।
 
आयोगका उपसचिव एवम् सहायक प्रवक्ता डा. थानेश्वर भुसालले जारी गरेको विज्ञप्तिमा भनिएको छ, ‘दलले आफ्नो नाम, विधान, नियम, छाप, झण्डा वा चिन्हमा भएको परिवर्तन वा संशोधन वा पदाधिकारीको हेरफेर भएका विषयको जानकारी राजनीतिक दल सम्बन्धी ऐन, २०७३ को दफा ५१ बमोजिम ३० दिन भित्र आयोगलाई दिनू’ ।