एमालेलाई नेकपा एसको जवाफ, ‘आयोगको प्रतिवेदन नहेरी मन्त्री ज्वालाबारे निर्णय गर्न सकिँदैन’

१० माघ, काठमाडौं । नेकपा एकीकृत समाजवादीले बालकुमारी घटना जाँचबुझ आयोगको प्रतिवेदन नहेरी भौतिक पूर्वाधार मन्त्री  प्रकाश ज्वालाबारे निर्णय गर्न नसकिने बताएको छ । एमालेले उनको राजीनामा मागिरहेका बेला बिहीबार बसेको सचिवालय बैठकमा मन्त्री प्रकाश ज्वालाबारे छलफल भएको थियो ।

बैठकमा जाँचबुझ आयोगको प्रतिवेदनले मन्त्री ज्वालाको दोष देखाएमा त्यही अनुसारको निर्णय हुनेबारे छलफल भएको थियो । कसलाई कुन कारणले दोषी देखाइएको छ भन्ने जानकारी नभएको र प्रधानमन्त्रीले जाँचबुझ आयोगको प्रतिवेदन अध्ययन गरिरहेकाले उनीबारे एमालेको माग अनुसार कुनै निर्णय नगरेको प्रचार विभाग प्रमुख जगन्नाथ खतिवडाले जानकारी दिए ।

१३ पुसमा दुई युवकको मृत्यु हुने गरी ललितपुरको बालकुमारीमा भएको घटनाबारे जाँचबुझ गर्न गठित आयोगले गत शुक्रबार उपप्रधानमन्त्री तथा गृहमन्त्री नारायणकाजी श्रेष्ठलाई प्रतिवेदन बुझाएको थियो ।

प्रतिवेदनमा फिल्ड कमान्डर डीएसपी उमेश लम्साल र निजी सुरक्षा अधिकारी (पीएसओ) बोधराज अधिकारीसँगै मन्त्री ज्वालालाई समेत दोषी किटान गरिएको छ । मन्त्री नगएको भए घटना नहुने समितिको निष्कर्ष छ । तर, प्रधानमन्त्री प्रचण्ड र नेकपा एसले प्रतिवेदन अध्ययन गर्न बाँकी रहेको बताउँदै आएका छन् ।