मन्त्रिपरिषद विस्तार र नाम छनोट बारे सत्ता पक्षका दल छलफलमा

२३ फागुन, काठमाडौं । आफ्नो पार्टीबाट कसलाई मन्त्री बनाउने भन्नेबारे सत्ता पक्षका दलहरू आन्तरिक छलफलमा जुटेका छन् । मन्त्रीको नाम टुंगो लगाउन उनीहरू छलफलमा जुटेका हुन् । प्रधानमन्त्री पुष्पकमल दाहाल प्रचण्ड दलहरूले नाम दिए आजै मन्त्रिपरिषद विस्तार गर्ने तयारीमा छन् ।

माओवादी केन्द्रका शीर्ष तहका नेताहरु अघिल्लो पटक मन्त्री बनेकाहरूलाई नदोहोर्याउने पक्षमा छन् । यसको अन्तिम निर्णय गर्ने जिम्मा अध्यक्ष प्रचण्डलाई दिइएको छ । एकीकृत समाजवादीको पनि सरकारमा जाने कि नजाने भन्ने विषयमा छलफल गर्न बैठक बस्दै छ । 

एकीकृत समाजवादीका अध्यक्ष माधवकुमार नेपाललाई प्रधानमन्त्री पुष्पकमल दाहाल प्रचण्ड, नेकपा एमालेका अध्यक्ष केपी शर्मा ओली लगायतले मंगलबार भेटेर सरकारमा सहभागी हुन अनुरोध गरेका थिए । अध्यक्ष नेपालले पार्टीको बैठक बसेर आवश्यक निर्णय लिने जवाफ दिएका थिए । त्यसैले एकीकृत समाजवादीको सचिवालय बैठक ११ बजे बस्दैछ ।

जसपाको केन्द्रीय कार्यकारिणी समितिको बैठक पनि पार्टी कार्यालय बालकुमारीमा बसिरहेको छ । बैठकमा मन्त्री चयनको विषयमा छलफल भइरहेको छ । जसपाको यो बैठक बिहान ९ बजेदेखि जारी छ । 

आज मन्त्रालय बाँडफाँटको विषयमा सत्ता गठबन्धनको कार्यदलको बैठक बस्ने तयारी छ । मन्त्रालय बाँडफाँटमा सहमति जुटाउन गठबन्धन दलका एक–एक जना नेताहरु सम्मिलित कार्यदल बनाइएको छ । कार्यदलले शीर्ष नेताहरूलाई सिफारिस गर्ने र आजै अन्तिम टुंगो लगाएर नयाँ मन्त्रीहरूको शपथ ग्रहण गराउने तयारी छ ।