रोकियो मन्त्री चौधरीको अमेरिका भ्रमण

२७ फागुन, काठमाडौं । प्रधानमन्त्री पुष्पकमल दाहाल 'प्रचण्ड'ले विश्वासको मत लिन लागेपछि महिला, बालबालिका तथा ज्येष्ठ नागरिक मन्त्री भगवती चौधरी अमेरिका भ्रमण स्थगित भएको छ । मन्त्री सहभागी हुनुपर्ने कार्यक्रममा सचिव नेतृत्वको टोली सहभागी हुने भएको छ । 

भ्रमणका लागि यही फागुन २४ मा बसेको नयाँ मन्त्रिपरिषद्को पहिलो बैठकले स्वीकृति दिए पनि प्रधानमन्त्री विश्वासको मत लिने समय यही बीचमा परेकाले मन्त्री चौधरीको भ्रमण स्थगित भएको हो ।

सोमबार र मंगलबार संयुक्त राष्ट्र संघको आयोजनामा न्युयोर्कमा हुने ‘कमिसन अन दि स्टाटस अफ वुमनझको ६८ औं सत्रमा भाग लिन मन्त्री चौधरी जाने कार्यक्रम तय भएको थियो । तर, प्रधानमन्त्रीले छिट्टै विश्वासको मत लिने तयारी गरेकोले उनको भ्रमण रोकिएको बताइएको छ ।