एन्फा उपाध्यक्षसहित १० जनालाई कारवाही गर्न खेलकुद मन्त्रालयको निर्देशन

३० फागुन, काठमाडौं । खेलकुद मन्त्रालयले विश्वकप फुटबल छनोटको तयारी स्वरूप मलेसियासँग मैत्रीपूर्ण खेलको लागि आज प्रस्थान गरेको टोलीमा एन्फा उपाध्यक्षसहित १० जना गएको भन्दै कारबाही गर्न निर्देशन दिएको छ ।

मैत्रीपूर्ण फुटबलका लागि मलेसिया गएको नेपाली राष्ट्रिय फुटबल टिमसँगै अनधिकृतरूपमा १० जना गएपछि मन्त्रालयले एन्फालाई कारबाही गर्न राष्ट्रिय खेलकुद परिषद् (राखेप) लाई पत्र पठाएको हो । 

नेपाली टिममा २३ जना खेलाडीबाहेक १६ अतिरिक्त सदस्य छन् । जसमा मुख्य प्रशिक्षक भिन्चेन्सो अल्बर्टो एनेस, सहायक प्रशिक्षक प्रवेश कटुवालसँगै विनोद डंगोल र मनिष तिम्सिना गोलकिपर प्रशिक्षक छन् । यस्तै, उत्तमराज भण्डारी टिम व्यवस्थापक रहँदा लोकेन्द्र कुँवर फिजियो र ज्ञानबहादुर राई किट व्यवस्थापकमा छन् ।

आज राष्ट्रिय टीमसँग मलेसिया गएको नेपाली टोलीमा एन्फाका उपाध्यक्षसहित १० जना सदस्य अफिसियल बनेर गएका मलेसिया उडेका थिए । एन्फाको टोलीमा उपाध्यक्ष दीपक खतिवडा, एन्फाका केन्द्रीय सदस्य महेन्द्र क्षेत्री, सीईओ इन्द्रमान तुलाधर एन्फाका जिल्ला सदस्यहरू सुनील लोप्चन, बुद्धिबहादुर गुरुङ, जयकृष्ण श्रेष्ठ, प्रवीण श्रेष्ठ, सुविनकुमार श्रेष्ठ र भरत घिमिरे अफिसियलको रुपमा र ज्ञानबहादुर राईलाई किट व्यवस्थापकको रुपमा मलेसिया गएपछि मन्त्रालयले कारबाहीको लागि निर्देशन दिएको हो ।

मन्त्रालयका प्रवक्ता शिवप्रसाद रेग्मीले प्रेस विज्ञप्ति जारी गर्दै अनावश्यक रुपमा गएका अफिसियल तथा एन्फा पदाधिकारीसहित सदस्यलाई कारबाहीको निर्देशन दिएका छन् ।

विज्ञप्तिमा भनिएको छ, ‘अखिल नेपाल फुटबल संघबाट सहभागी हुनको लागि खेलमा संलग्न समूहबाहेक १० जना अनावश्यक व्यक्तिहरूसमेत सहभागीका रुपमा जान लागेको र दशरथ रंगशालामा गैर फुटबल गतिविधि संचालनको लागि एन्फाले राष्ट्रिय खेलकुद परिषदमा पत्राचार गरेको भनि विभिन्न मिडियाबाट प्रेसित समाचार प्रति यस मन्त्रालयको ध्यानाकर्षण भएको छ ।’

प्रवक्ता रेग्मीको अनुसार राष्ट्रिय खेलकुद विकास ऐनअनुसार राष्ट्रिय खेलकुद परिषदको स्वीकृति लिई अन्तर्राष्ट्रियस्तरमा हुने खेलकुद प्रतियोगितामा सहभागी हुनुपर्ने कानूनी व्यवस्था रहेको छ । तर १० जनाका लगि स्वीकृति नलिएको जानकारी प्राप्त भएको कारण उनीहरुलाई कारबाहीको निर्देशन गरिएको हो ।

नेपालले चैत २ मा मलेसियाविरुद्ध मैत्रीपूर्ण खेल्नेछ। त्यहाँ केही दिन तयारी गरेपछि नेपाली टिम चैत ८ र १३ गते बहराइनसँग खेल्न बहराइनमा जानेछ। यी दुई खेल विश्वकप छनोटका खेल हुन्। दशरथ रंगशालाको मैदान खराब भएपछि नेपालले होम म्याच समेत बहराइनमा खेल्न लागेको हो।