सुन र सहकारी प्रकरणले दुङदुङती गनायो माओवादी !

३ चैत, काठमाडौं । नेकपा माओवादी शान्ति प्रक्रियामा आएपछि लडाकु शिविरमा भएको भ्रष्टाचारका फाइल अझै अख्तियार र सर्वोच्च अदालतमा सुरक्षित छन् । तत्कालीन कमाण्डर रामबहादुर थापादेखि कृष्णबहादुर महरा हुँदै जनार्दन शर्मा र टोपबहादुर रायमाझीसहित १४ जना नेतामाथि अरबौं क्यान्टोनमेन्ट भ्रष्टाचारको विषय अहिले चर्चामा मात्रै छ । यो प्रकरणको छानविन नहुँदै माओवादी सुन र सहकारी प्रकरणमा मुछिन आइपुगेको छ ।  

एमाले र माओवादी मिलेर नेकपा बनेपछि अहिले बादल र रायमाझीसहितका केही नेता एमालेमा छन् । माओवादीमै भएका पूर्व उपराष्ट्रपति नन्दकिशोर पुन र पुर्वसभामुख भइसकेका उपाध्यक्ष कृष्णबहादुर महरालगायतका केही नेता सुन र सहकारीमा मुछिएका छन् । सुन तस्करी र सहकारी ठगीका विषयले नेकपा माओवादी नै पहेँलो भइसकेको अवस्था छ । अर्थमन्त्री बनेका वर्षमान माथि पनि सुन प्रकरणमा जोडिएको गाइगुई चल्न थालेको छ ।  
 
यही सुन र सहकारी प्रकरणले बदनाम भइसकेको माओवादीका अध्यक्ष पुष्पकमल दाहाल प्रचण्ड अहिले देशका प्रधानमन्त्री छन् । देशको चाबी उनको हातमा छ । उनले भर्खरै सत्ता समीकरण बदलेर सरकारी ठगीमा मुछिएका राष्ट्रिय स्वतन्त्र पार्टीका सभापति रवि लामिछानेलाई उपप्रधानसहित गृहमन्त्री बनाएका छन् । यही बेला माओवादीका शीर्ष नेता र उनको परिवार सुन तस्करी र सहकारी ठगीमा तानिएका छन् ।   
 
सहकारी ठगी तथा सुन तस्करी प्रकरणमा जोडिएका पूर्व उपराष्ट्रपति नन्दबहादुर पुनका छोरा दीपेश शुक्रबार साँझ पक्राउ परेका छन् भने उपराष्ट्रपतिका तत्कालीन सल्लाहकार जीवनकुमार गुरुङविरुद्ध १ सय ३८ केजी सुन तस्करी प्रकरणमा मुद्दा दायर भएको छ । यो भन्दा उच्च स्तरबाट सुन तस्करलाई संरक्षण गर्ने पूर्व सभामुख तथा माओवादी उपाध्यक्ष कृष्णबहादुर महरामाथि के कारबाही हुन्छ भन्ने प्रश्न आकर्षित भएको छ । 

पुर्वमाओवादी र अहिले नेकपा एमालेका उपाध्यक्ष बादलका छोरा प्रतीक थापा नक्कली भुटानी शरणार्थी बनाएर अमेरिका पठाइदिने भन्दै भएको ठगी प्रकरणमा मुछिएका छन् । यही प्रकरणमा करोडौं ठगी धन्दामा संलग्न भएको आरोपमा पूर्व उर्जामन्त्री तथा नेकपा एमालेका सचिव टोपबहादुर रायमाझी र  उनका छोरा सन्दिप रायमाझी अहिले जेलमा छन् । उनीहरू पुर्वमाओवादी हुन् । 

अब माओवादीमा अरु को को सुन तस्करीमा जोडिएका छन् भन्ने खोजी भइरहेको छ । तत्कालीन गृहमन्त्री थापाका सुरक्षा सल्लाहकार इन्द्रजित राई पनि जेलमा नै छन् । दीपेश पुनले जीबी राई अध्यक्ष रहेको सुप्रिम सहकारीको बचत रकम हिनामिना गरेका थिए । बुटवलका १० हजार बचतकर्ताको साढे ७८ करोड हिनामिना प्रकरणमा पनि दीपेश जोडिएका छन् । उनी माओवादी केन्द्रका विशेष प्रदेश कमिटीका सदस्य तथा अखिल क्रान्तिकारीका महासचिव हुन् । पुनका अर्का छोरा जितेन्द्र पनि सुन तस्करीमा संलग्न भएको भन्दै खोजी भइरहेको छ । 

आठ करोड ५५ लाखको सुन तस्करी तथा बेचबिखनमा महरा बाबुछोरा संलग्न भएको भनेर प्रहरीको विशेष अनुसन्धान ब्यूरो (सीआईबी) को प्रतिवेदनमा किटान हुँदा पनि महरामाथि मुद्दा दर्ता त भएको छैन । महरा बाबुछोराले चिनियाँ सुन तस्करहरूसँग २५६ पटक टेलिफोन संवाद गरेको कल डिटेल रेकर्ड प्रहरी अनुसन्धानका आधारमा जिल्ला सरकारी वकिलको कार्यालयले काठमाडौं जिल्ला अदालतमा पेश गरेको थियो ।

इलेक्ट्रिक सिगरेट (भेप) मा लुकाएर सुन ल्याउने चिनियाँ नागरिक लीसँग व्यक्तिगत रूपमा सम्बन्धमा रहेका महरा बाबुछोराले उनलाई सहयोग पुर्याउन त्रिभुवन अन्तर्राष्ट्रिय विमानस्थलको भन्सारका अधिकारीलाई तारन्तार फोन गरेको तथ्य स्थापित भइसकेको छ । सुन ल्याउने मात्र होइन, भन्सारमा रोकिएपछि त्यहाँबाट मिलिभगतमा बेच्ने सञ्जालमा महरा बाबुछोरा भएको किटान प्रहरी प्रतिवेदनमा छ जसलाई सुन जाँचबुझ आयोगले पनि प्रमाण मानेको छ । प्रहरीले कल डिटेल रेकर्डसहित कृष्णबहादुर र राहुलको विवरण खुलाउँदा पनि उनीहरूको प्रसंग छायाँमा पारेर जिल्ला सरकारी वकिल कार्यालय, काठमाडौंले गत असार २७ मा विशेष अदालतमा मुद्दा दायर गरेको थियो ।

अर्कातर्फ, त्रिभुवन अन्तर्राष्ट्रिय विमानस्थलबाट १ सय ३८ किलो सुन तस्करी गरेको आरोपमा पूर्व उपराष्ट्रपति पुनका तत्कालीन सल्लाहकार ‘वैदेशिक मामिला विज्ञ’ गुरुङविरुद्ध जिल्ला अदालत काठमाडौंमा मुद्दा दायर भएको छ । विमानस्थल भन्सार कार्यालयका अनुसार १ अर्ब ४० करोड ५५ लाख ३० हजार बिगो जरिवाना र ५ वर्ष कैद सजाय माग दाबीसहित मुद्दा दर्ता भएको हो । भन्सारले गरेको छानबिन र अनुसन्धानमा भरियाले विमानस्थल हुँदै दुबईलगायत देशबाट तस्करी गरेर ल्याएको सुन गुरुङले बुझिलिने गरेको पाइएको थियो । उनी डिल्लीबजारस्थित प्लाटिनम कलेजका कार्यकारी प्रमुखसमेत हुन् ।
 
प्रधानमन्त्री प्रचण्डसँग माओवादी युद्धकालदेखि निकट मित्र रहेका महराको सुन तस्करी काण्डले माओवादी समेत मुछिएको छ । यसअघिका थुप्रै प्रकरणहरूमा उनी विवादित रहँदै आए । माओवादी सशस्त्र युद्धअघि ०४८ सालमा मशालबाट चुनाव जितेर संसदीय दलको नेता बन्दादेखि ०७४ सालमा सभामुख हुँदासम्म महरा सधैँ शक्तिको नजिक रहे, कम्तीमा प्रचण्डका अनवरत सारथी बनिरहे महरा ।

पार्टी अध्यक्ष प्रचण्ड देशको प्रधानमन्त्री पदमा भएकै बेला उनै महरामाथि अवैध सुन तस्करीमा संलग्न भएको आरोपमा मुद्दा चलाउन सिफारिस भएको छ । सरकारले पूर्वन्यायाधीश डिल्लीराज आचार्य नेतृत्वको सुन तस्करी सम्बन्धी छानबिन गर्न गठित उच्चस्तरीय आयोगले महरालाई मुद्दा चलाउन सिफारिस गरेको छ । राज्यको उच्च पदमा रहिसकेको व्यक्ति शक्ति र रवाफमा राज्यसंयन्त्र नै कब्जा गरेर सुन तस्करीमा लाग्नु लज्जाको विषय हो । 

युद्धकालीन राजनीतिसम्म इमान्दार नेताको छवि बनाएका महरा शान्तिपूर्ण राजनीतिमा आएसँगै एकपछि अर्को विवादमा निरन्तर मुछिँदै र जोगिँदै आएका थिए । माओवादीले लडाकू व्यवस्थापनका लागि शिविर निर्माण र उनीहरूको व्यवस्थापनका नाममा राज्य कोषबाट करिब ४० करोड रुपैयाँ पेश्की रकम लगेको थियो । सो बेला महरा सञ्चारमन्त्री थिए । 

त्यस्तै १८ भदौ २०६७ मा उनले एक चिनिया नागरिकसँग ५० करोड रुपैयाँ माग गरेको अडियो सार्वजनिक भएको थियो । उक्त अडियोमा उनले आफ्नो पार्टीको नेतृत्वमा सरकार गठन गर्न सांसद खरिद गर्नुपर्ने भन्दै रकम मागेका थिए । अडियो टेप सार्वजनिक भएपनि उनीमाथि अनुसन्धान भएन । पदाधिकारी विहीन अवस्थामा रहेको त्यतिबेलाको अख्तियारमा सचिव भगवतीकुमार काफ्ले कार्यवाहक प्रमुख थिए, उनले अनुसन्धान अघि बढाउन सकेनन् ।

२०७४ सालको आम निर्वाचनमा दाङ–२ बाट चुनाव जितेका महरा सभामुख निर्वाचित भए । सभामुख रहेकै बेला २०७६ सालमा महरामाथि संघीय संसद सचिवालयकै कर्मचारीमाथि यौन दुर्व्यवहार गरेको आरोप लाग्यो । आरोप लागेका महरा पक्राउ परे र पुर्पक्षका लागि थुनामा पनि परे । तर जिल्ला अदालतबाट सफाइ पाएपछि रिहा भए ।  उनै महरामाथि अहिले सुन तस्करीमा संलग्न रहेको आरोप लागेको छ । यसरी हेर्दा माओवादी नेता श्रङ्खलाबद्ध सुन, भ्रष्टाचार र ठगी प्रकरणमा लिप्त भएर पार्टीलाई नै बदनाम बनाएको देख्न सकिन्छ ।