उद्योगपति एवं सांसद विनोद चौधरीलाई बयानमा बोलाउँदै सीआईबी

४ चैत, काठमाडौं । बाँसबारी जग्गा प्रकरणमा उद्योगपति एवं नेपाली कांग्रेसका सांसद विनोद चौधरीलाई बयानमा बोलाइने भएको छ । नेपाल प्रहरीको केन्द्रीय अनुसन्धान ब्यूरो (सीआईबी)ले बाँसबारी छालाजुत्ता कारखानाको जग्गा हिनामिना प्रकरणमा चौधरीको बयान लिन बोलाउन लागिएको हो । 

आइतबार गृह मन्त्रालयमा गृहमन्त्री र सुरक्षा निकायका अधिकारीबीच भएको छलफलमा बाँसबारी जग्गा प्रकरणमा जोडिएका सबैलाई कारबाहीको दायरामा ल्याउन चौधरीको पनि बयान लिने निर्णय भएको हो । बैठकमा गृहमन्त्री रवि लामिछानेले सुन तस्करी प्रकरण जाँचबुझ आयोगको प्रतिवेदन कार्यान्वयन गर्न  निर्देशन दिएका थिए ।

सीआईबीले बाँसबारी जग्गा प्रकरणमा अनुसन्धानका लागि १८ माघमा अरुण कुमार चौधरीसहित तीन जनालाई पक्राउ गरेको थियो । तर जिल्ला अदालत, काठमाडौंका न्यायाधीश यज्ञप्रसाद आचार्यको इजलासले हिरासतमा राखेर अनुसन्धान गर्नुपर्ने अवस्था नदेखिएको भन्दै रिहा गर्न भनेको थियो । 

सरकारी स्वामित्वको बाँसबारी छालाजुत्ता कारखानाको १० रोपनी जग्गा निजी स्वामित्वको च्याम्पियन फुटवेयर प्रालिलाई बिक्री गरिएको थियो । हाल च्याम्पियन फुटवेयर बन्द भइसकेको छ र त्यसको सम्पत्ति सीजी चाँदबाग रेसिडेन्सी प्रालिको नाममा छ ।