राष्ट्रिय सभाको उपाध्यक्षका लागि एमालेकी घिमिरे र कांग्रेसकी पुडासैनीले दिए उम्मेदवारी

२७ चैत, काठमाडौं । राष्ट्रिय सभाको उपाध्यक्ष पदका लागि नेकपा एमालेकी विमला घिमिरे र नेपाली कांग्रेसकी विष्णु देवी पुडासैनीले उम्मेदवारी दर्ता गराएका छन् । मंगलबार उनीहरुले उम्मेदवारी दर्ता गराएका हुन् । गठबन्धनका तर्फबाट घिमिरे र विपक्षी कांग्रेसबाट पुडासैनीले उम्मेदवारी दिएका हुन् । 

संघीय संसद् सचिवालयले उनीहरुको मनोनयन पत्र दर्ता गरेको छ । घिमिरेको प्रस्तावकमा राष्ट्रिय सभामा एमाले प्रमुख सचेतक रहेकी भगवती न्यौपाने छिन् । समर्थकमा नेकपा माओवादीका गोपी बहादुर सार्की अछामी रहेका छन् । उनी ०७६ माघ ९ गते राष्ट्रिय सभा सदस्य बनेकी हुन् । 

कांग्रेसकी विष्णुदेवी पुडासैनीको प्रस्तावकमा दुर्गा गुरुङ र समर्थकमा नारायणदत्त भट्ट छन् । पुडासैनी गत माघमा राष्ट्रिय सभामा निर्वाचित भएकी थिइन् । महिला क्लस्टरका सात जनामध्ये वाग्मती प्रदेशबाट पुडासैनी निर्वाचित भएकी हुन् । पुडासैनी ७३ वर्षीया सांसद हुन् ।