६७ अगुवाको दललाई अपील, ‘शिक्षामा हस्तक्षेप नगर’

३ वैशाख, काठमाडौं । नागरिक समाजका अगुवाहरूले विश्वविद्यालयसहित शैक्षिक प्राज्ञिक संस्थाहरूमा हस्तक्षेप नगर्ने घोषणा गर्न राजनीतिक दलहरूलाई आग्रह गरेका छन् । शैक्षिक–प्राज्ञिक संस्थाहरूको स्वायत्ततालाई अक्षुण्ण राख्न कुनै पनि प्रकारका अस्वस्थ र अनावश्यक हस्तक्षेप नगर्ने संकल्प एवं प्रतिबद्धता हुनुपर्ने उनीहरूको निष्कर्ष छ ।

आज एक संयुक्त वक्तव्यमार्फत नागरिक समाजका अगुवाहरूले राजनीतिक दल र तिनको नेतृत्वबाट स्पष्ट भाषामा संयुक्त रूपमा तत्काल सार्वजनिक रूपमा उद्‍घोष गर्न र प्रतिबद्धताको पूर्ण पालना गर्न आग्रह गरेका हुन् ।

देशका विश्वविद्यालय, स्वास्थ्य विज्ञान प्रतिष्ठान तथा अध्ययन–अनुसन्धानका निम्ति स्थापित उच्च स्तरका शैक्षिक–प्राज्ञिक संस्थाहरू बारम्बारको अनावश्यक राजनीतिक हस्तक्षेपबाट गम्भीर रूपमा आक्रान्त हुने गरेको उनीहरूको भनाइ छ ।