कांग्रेसले सघाउने भनेपछि हच्किएर एमालेले सोडारीलाई दियो समर्थन, मुख्यमन्त्रीमा दाबी पेश

६ वैशाख, धनगढी । सुदूरपश्चिम  प्रदेशमा नेकपा एकीकृत समाजवादी संसदीय दलका नेता दीर्घ सोडारीले मुख्यमन्त्रीमा दाबी पेस गरेका छन् । नेकपा एमालेले समर्थन जनाएपछि सोडारीले दाबी पेस गरेका हुन् । सोडारीलाई एमाले, माओवादी, नागरिक उन्मुक्ति (रञ्जिता समूह) र स्वतन्त्र सांसदले समर्थन गरेका छन् । 

आफूले समर्थन नगर्दा कांग्रेसको सहयोग लिएर सोडारी नै मुख्यमन्त्री हुने भएपछि एमाले हच्किएको हो । उसले अन्तिममा आएर सोडारीलाई समर्थन गरेको पत्र दिएको थियो । त्यसपछि उनले एमालेसहितको समर्थनमा मुख्यमन्त्रीमा दावी पेश गरेका हुन् । एकीकृत समाजवादीलाई मुख्यमन्त्री दिन तयार भए पनि एमालेले सोडारीलाई मुख्यमन्त्रीमा समर्थन गर्न नसकिने अडान लिएको थियो । 

पहिलो पटकको आह्वानमा नागरिक उन्मुक्तिकै दुई जना सांसदको दाबी पेस भएपछि प्रदेश प्रमुखले लक्ष्मण किशोर चौधरी र कैलाश चौधरी दुवै जनालाई अस्वीकार गर्दै मंगलबार पुनः दाबी पेस गर्न आह्वान गरेका थिए । 

एमालेले आफ्नो अडान कायम राखेमा एकीकृत समाजवादीले कांग्रेससँग मिलेर भए पनि दाबी पेस गर्ने तयारी गरेपछि उ समर्थन दिन तयार भएको हो । यसअघि लागि कांग्रेस पनि एकीकृत समाजवादीलाई समर्थन गर्न तयार भएको थियो ।  एकीकृत समाजवादीले कांग्रेस, राप्रपासँग सहकार्य गरेर नागरिक उन्मुक्तिका रेशम पक्षधर सांसद लक्ष्मण किशोर चौधरीलाई मुख्यमन्त्रीमा समर्थन गरेपछि केन्द्रीय सत्ता गठबन्धनमै तरंग पैदा भएको थियो । 

एकीकृत समाजवादीको कदमले केन्द्रीय सत्ता गठबन्धनमै असर पर्ने देखिएपछि गठबन्धनका शीर्ष नेताहरु सुदूरपश्चिममा एकीकृत समाजवादीलाई मुख्यमन्त्रीमा समर्थन गर्न तयार भएका थिए । उक्त समझदारीपछि मंगलबार एकीकृत समाजवादीले समर्थन फिर्ता लिएपछि समकिरणमा तनाव उत्पन्न भएको थियो ।