आगालागीबाट ललितपुर र भक्तपुरमा ७ जना घाइते, पौने २ करोडको क्षति

२३ वैशाख, काठमाडौं । ललितपुर र भक्तपुरको दुवाकोटस्थित प्लाई कार्पेट कारखानामा भएको आगलागीमा ७ जना घाइते भएका छन् । ललितपुर महानगरपालिका–१७ स्थित एक टहरोमा आइतबार आगलागी हुँदा सन्जय गिरी उनकी श्रीमती रुपा गिरीसँगै उनीका १५ वर्षीय छोरा नित गिरी, ८ वर्षीया छोरी प्रिया र ३ वर्षीया छोरी एलिसा घाइते भएका हुन् । 

उनीहरुलाई उपचारका लागि किस्ट अस्पताल उपचार भइरहेको छ । मोबिल स्टोर रहेको टहरोमा भएको आगलागीमा परी उनीहरु घाइते भएका हुन् । यस्तै  भक्तपुरको चाँगुनारायण नगरपालिका वडा नम्बर २ दुवाकोटस्थित प्लाई कार्पेट कारखानामा भएको आगलागीबाट झण्डै २ करोड रुपैयाँ बराबरको क्षति भएको छ भने घाइते दुई जनामध्ये एक जनाको अवस्था गम्भीर छ ।

सन्तोषमान श्रेष्ठले सन्चालन गरेको ज्योति प्लाई कार्पेट कारखानामा गएराति १२ बजे आगो लागेको थियो । आज बिहान ४ बजे आगो नियन्त्रणमा लिइए पनि हालसम्म पनि पूर्णरुपमा ननिभेको भक्तपुर प्रहरीले जनाएको छ । जिल्ला प्रहरी परिसर भक्तपुरका प्रवक्ता राजन कार्कीले आगो लागेको स्थानबाट अहिले पनि धुवाँ आइरहेकाले दमकल र स्काभेटरको सहयोगमा आगो निभाउने काम जारी रहेको बताए । 
आगो निभाउन भक्तपुर, काठमाडौं, ललितपुर र काभ्रेबाट ७ वटा दमकल तथा चार वटा पानी ट्यांकर प्रयोग गरिएको थियो । नेपाल प्रहरी र सशस्त्र प्रहरीको टोली समेत खटिएको थियो । आगलागीमा परी रामेछापको लिखु तामाकोशी गाउँपालिका वडा नं. ६ घर भई हाल भक्तपुरको दुवाकोट बस्ने वर्ष २३ को बुद्धनारायण श्रेष्ठ सामान्य घाइते भएका छन् ।

भारत घर घई उद्योगमा काम गर्ने २९ वर्षका मनु उर्वा गम्भिर घाइते भएका छन् । उनलाई भक्तपुरको डा.ईवामुरा अस्पतालबाट थप उपचारका लागि कीर्तिपुर अस्पताल लगिएको छ । आगलागीबाट १ करोड ८० लाख रुपैयाँ बराबरको क्षति भएको बताइएको छ ।