कम्युनिस्टविरुद्ध लड्ने बेला आयो, तयार भएर बस्नु: देउवा

२६ वैशाख, काठमाडौं । नेपाली कांग्रेसका सभापति शेरबहादुर देउवाले कम्युनिष्टहरूले सर्वोच्च अदालत र निर्वाचन आयोगलाई प्रभावमा पारेर सत्ता कब्जा गर्ने रणनीति बनाएको बताएका छन् । कम्युनिष्टहरूको यो रणनीति असफल बनाउन कांग्रेस डटेर लाग्नुपर्ने उनको भनाए छ । उनले लडाइका लागि तयाार भएर बस्न कार्यकर्ताहरूलाई निर्देशन दिएका छन् । 

बुधबार बिहान गण्डकीका कांग्रेस सांसदहरुसँग भेटमा देउवाले कम्युनिस्टहरू सत्ता कब्जाको शैलीमा अगाडि बढेको र संवैधानिक निकाय निर्वाचन आयोगको भूमिकालाई विवादास्पद बनाएको देउवाले बताए । सांसद डिल्लीराम सुवेदीका अनुसार देउवाले कम्युनिस्टहरू सत्ता कब्जाको शैलीमा आएकाले कांग्रेसले सत्ता कब्जा गर्ने मनोविज्ञानसँग डटेर लड्नुपर्ने बताएका थिए । 

उनले कांग्रेसले स्थानीय तहदेखि सडक र सदनमा एक भएर लड्न तयार हुनुपर्ने भन्दै त्यही अनुसारको मानसिकता बनाएर कार्यक्रमहरु बनाउन आवश्यक भएको बताएका थिए । उनले अब देश भरका नेता र कार्यकर्तालाई तयारी अवस्थामा राख्नुपर्ने बताएका थिए । गण्डकीमा प्रदेश सरकारले विश्वासको मत लिनका लागि अदालतको फैसला अस्वाभाविक देखिएको भन्दै सांसदहरूले सभापतिसँग गुनासो राखेका थिए । 

सभामुख सहितको विश्वासको मतले गण्डकीका मुख्यमन्त्री खगराज अधिकारीलाई बहुमत पुगेको सभामुख कृष्ण धितालले घोषणा गरेका थिए । त्यसविरुद्ध मंगलबार कांग्रेसले सर्वोच्चमा रिट दायर गरेको छ । न्यायीक लडाइका लागि सर्वोच्चमा गएको र राजनीतिक मोर्चाबाट पनि खबरदारी गर्नुपर्ने अवस्था रहेको आफूहरुले सभापतिलाई सुनाएको सुवेदीले बताए ।

गत आइतबार गण्डकीका मुख्यमन्त्रीले विश्वासको मत लिँदा उनको पक्षमा परेको ३० मतलाई नै सभामुख कृष्णप्रसाद धितालले बहुमत घोषणा गरिदिएका थिए । त्यसका विरुद्ध कांग्रेस संसदीय दलका नेता सुरेन्द्रराज पाण्डेले मंगलबार सर्वोच्चमा रिट दर्ता गरेका छन् । रिटको पेसी बिहीबारलाई तोकिएको छ । यही विषमा छलफल गर्न पुगेका संसदसँग देउवाले कम्युनिष्टसँग लड्न तयार भएर बस्न निर्देशन दिएका हुन् ।