कोशी र गण्डकी सरकार गठनविरुद्ध दायर छुट्टाछुट्टै रिटमाथि आज सुनुवाइ

२८ वैशाख, काठमाडौं । कोशी र गण्डकी प्रदेश सरकार गठन विरुद्ध दायर रिटमाथि आज सर्वोच्च अदालतमा सुनुवाइ हुँदै छ । कोशीका निवर्तमान मुख्यमन्त्री केदार कार्कीले बिहीबार (हिजो) रिट दायर गरेका थियो भने गण्डकीको सुनुवाइ सर्वोच्चका पूर्व न्यायाधीशको निधनका कारण स्थगित भएको थियो । 

नेकपा एमाले कोसी प्रदेश संसदीय दलका नेता हिक्मत कार्की बिहीबार मुख्यमन्त्रीमा नियुक्त भएपछि त्यसविरुद्ध रिट दायर गरिएको हो । सरकार गठनका निम्ति दाबी पेस गर्न प्रदेश प्रमुखले गरेको आव्हानलाई अन्तरिम आदेशमार्फत बदर गर्न रिट निवेदनमा माग गरिएको छ । कार्कीले आफूलाई मुख्यमन्त्रीमा निरन्तरता दिन माग गरेका छन् ।

यस्तै गण्डकी प्रदेश सरकार विरुद्ध दायर रिटमाथि आज सर्वोच्च अदालतमा सुनुवाइ हुँदै छ । मुख्यमन्त्री खगराज अधिकारीले प्रदेश सभाबाट पाएको विश्वासको मतका विषयमा नेपाली कांग्रेस गण्डकी प्रदेश संसदीय दलका नेता सुरेन्द्र पाण्डेले गएको मंगलबार रिट दायर गरेका थिए । 

सर्वोच्चको आदेश देखाउँदै मुख्यमन्त्री अधिकारीले ६० प्रदेशसभा सदस्यमध्ये पाएको ३० मतलाई बहुमत भनी विश्वासको मत प्राप्त गरेको सभामुख कृष्णप्रसाद धितालले घोषणा गरेपछि पाण्डे अदालत गएका हुन् । गएको आइतबार मुख्यमन्त्री अधिकारीले विश्वासको मत लिएका थिए ।

संविधान र गणितको अन्तर्राष्ट्रिय नियम नै बदल्ने गरी सभामुखद्वारा गरिएको घोषणा बदर गरी आफूलाई संविधानको धारा १६८ (३) को मुख्यमन्त्री नियुक्तिको आदेश दिन पाण्डेले रिटमार्फत माग गरेका छन् ।