संसद अवरोधबारे छलफल गर्न सभामुखले बोलाए मन्त्रीसहित दलका नेताको बैठक

३० वैशाख, काठमाडौं । प्रतिनिधि सभामा देखिएको अवरोध हटाउने विषयमा छलफल गर्न सभामुख देवराज घिमिरेले मन्त्रीसहित दलका प्रमुख सचेतक, सचेतक र दलका नेताको बैठक बोलाएका छन् । सिंहदरबारस्थित आफ्नै कार्यकक्षमा आइतबार दिउँसो २ बजे बस्ने गरी उनले बैठक बोलाएको घिमिरेका प्रेस सल्लाहकार शेखर अधिकारीले जानकारी दिए । 

बैठकमा कानुन, न्याय तथा संसदीय मामिला मन्त्री र प्रमुख दलका प्रमुख नेतालाई बोलाइएको छ । घिमिरेले संसद खुलाएर नीति तथा कार्यक्रमको तयारी लगायतका विषयमा छलफल गर्न मन्त्रीसहित प्रमुख दलका प्रमुख सचेतक र सचेतकलाई बोलाएका हुन् । 

सहकारीको रकम अपचलनको आरोप लागेका उपप्रधान तथा गृहमन्त्री रवि लामिछानेमाथि छानबिन गर्न संसदीय छानबिन समिति गठनको माग राखेर प्रमुख प्रतिपक्षी दल नेपाली कांग्रेसले सदन अवरुद्ध गर्दै आएको छ । समिति गठन नभएसम्म संसद बैठक चल्न नदिने अडानका कांग्रेस छ । सभामुखले यसअघि बोलाएका बैठकमा पनि समिति बनाउने बारे सहमति हुन सकेको थिएन ।