डोटीमा जीप दुर्घटनाः २ जनाको मृत्यु, ७ जना घाइते

२३ जेठ, धनगढी । डोटीमा जीप दुर्घटना हुँदा बालिकासहित २ जनाको मृत्यु भएको छ । दार्चुलाबाट धनगढीतर्फ आइरहेको जीप बुधबार बिहान भीमदत्त राजमार्ग अन्तरगत जोरायल गाउँपालिका–१ खडिनामा दुर्घटना भएको हो । 

सुदूरपश्चिम प्रदेश ०१–००१ ज १४८९ नम्बरको जीप दुर्घटनामा घाइते भएकी दार्चुलाको लेकम गाउँपालिका–६ का हरिश पार्कीकी २ वर्षीया छोरी रितिकाको निसर्ग हस्पिटलमा उपचारका क्रममा मृत्यु भएको हो । मृतकका बुवा पार्की र आमा भावना ओड पार्की पनि घाइते छन् ।

दुर्घटनामा जिप चालक बैतडीको डिलासैनी गाउँपालिका–५ का १९ वर्षीय बासुदेव नाथ, दार्चुलाको लेकम गाउँपालिका– ६ बस्ने ४५ वर्षीय जगतसिंह धामी, डिलासैनी गाउँपालिका– ६ का १७ वर्षीय अर्जुन लुहार, डिलासैनी– ३ कि २२ वर्षीया रमिता ओड र मालिकार्जुन गाउँपालिका –४ बस्ने ७४ वर्षीया मानमति धामी पनि घाइते छन् ।

दुर्घटनामा परेर जिपमा सवार महिलाको घटनास्थलमै मृत्यु भएको हो भने बालिकाको उपचारका क्रममा मृत्यु भएको प्रहरीले जनाएको छ । प्रदेश ट्राफिक प्रहरी कार्यालय अत्तरियाका अनुसार घटनास्थलमै मृत्यु भएकी महिलाको सनाखत हुन सकेको छैन ।