समयभित्र महशुल नतिरेपछि चौधरी समूहको सीजी कम्युनिकेशनको लाइसेन्स खारेज

२४ जेठ, काठमाडौं । तोकिएको समयभित्र महसुल नतिरेपछि चौधरी समूह अन्तर्गतको सीजी कम्युनिकेशनको अनुमति पत्र (लाइसेन्स) खारेज भएको छ । लामो समयदेखि यो कम्युनिकेशन शुल्क विवादमा थियो । सीजीले तोकिएको अवधिभित्र शुल्कसहित नवीकरणका लागि निवेदन नदिएपछि लाइसेन्स खारेज भएको नेपाल दूरसञ्चार प्राधिकरणले जनाएको छ । 

प्राधिकरणका अनुसार सीजी कम्युनिकेशन (तत्कालीन एसटीएम टेलिकम प्रालि) ले २१ नोभेम्बर २००३ मा ग्रामीण दूरसञ्चार सेवाको लाइसेन्स लिएको थियो । तर, उसले लामो समय लिंगरिङ गर्दै आएको र तोकिएको अवधिमा निवेदन नदिएकाले खारेज भएको हो । समयभित्र निवेदन नदिएपछि दूरसञ्चार ऐन २०५३ को दफा २५(५) अनुसार स्वतः खारेज हुने व्यवस्था छ । 

२०८० सालको मंसिर महिनादेखि नै सीजीको लाइसेन्स खारेज भएको भएपनि प्राधिकरणले भने यो विषय हालै मात्र सार्वजनिक गरेर जानकारी दिएको हो । तत्कालीन समयमा एसटीएम टेलिकमले ग्रामीण क्षेत्रमा मोबाइल सेवा दिने उद्देश्यले लाइसेन्स लिएको थियो । तर, सीजीले यसका लागि पूर्वाधार नै निर्माण गरेको थिएन । सीजीले लाइसेन्स लिएको २० वर्ष कटिसकेको प्राधिकरणले जनाएको छ ।