गृहमन्त्री नांगो भइसक्नु भयो, कपडा लगाएको अनुभूति नगर्दा हुन्छः पौडेल

२६ जेठ, काठमाडौं । नेपाली कांग्रेसका नेता एवं सांसद प्रदीप पौडेलले संसदीय छानबिन समिति गठन भइसकेपछि पनि गृहमन्त्री रवि लामिछानेले पदबाट राजीनामा नदिएर नैतिक धरातल थप कमजोर बनाएको बताएका छन् । उनले गृहमन्त्रीले नैतिकताको बोध नगरी नांगो भइसकेपछि पनि आफूलाई कपडा लगाएको अनुभूति गरिरहेको टिप्पणी गरेका छन् । 

शनिबार काठमाडौंमा आयोजित एक कार्यक्रममा पौडेलले राष्ट्रिय स्वतन्त्र पार्टीका सभापति समेत रहेका उपप्रधान एवं गृहमन्त्री रवि लामिछानेप्रति लक्षित गर्दै राजनीतिमा नैतिकता व्यक्तिसँग निर्भर गर्ने कुरा भन्दै नैतिकताको बोध नगरिने राजनीति कांग्रेसले अन्त्य गर्ने बताए । 

उनले भने, ‘सहकारी ठगीका विषयमा छानबिन समिति बनि सकेपछि पनि गृहमन्त्री पदमा रहिरहनु नांगो भइसकेपछि पनि आफूलाई कपडा लगाएको ठान्नु सरह हो । छानबिन समिति बनाउँदा पनि राजीनामा दिनुपर्दैन भनेपछि मात्रै संसदीय छानबिन समिति बनेको हो । गृहमन्त्री अझै मेरो नाम छैन भनेर बसिरहनु भएको छ । यो भनेको नांगो भएको अवस्थामा कपडा लगाएको महसुस गर्नु सरह हो ।’

उनले नेपाली कांग्रेसले संसदमा सहकारीको मुद्दा नउठाएको भए ७३ लाख जनता जोडिएको मुद्दालाई निर्णायक मोडमा नपुग्ने बताए । उनले भने, ‘कांग्रेस पार्टीले संसदमा सहकारीको मुद्दा त्यस ढंगबाट अगाडि ल्याउँदैन थियो भने यहाँ सहकारी पीडितहरूले न्याय पाउने अवस्था हुँदैन थियो । ७३ लाख जनता जोडिएको यो मुद्दालाई कांग्रेसले एउटा निर्णायक मोडमा पुर्याएको हो । संसदमा कांग्रेसले यसलाई सशक्त ढंगबाट नउठाएको भए साना पार्टीहरू छोडेर कुनै पनि राष्ट्रिय पार्टीले यो सहकारीको मुद्दालाई उठाउने अवस्था थिएन ।’

नेता पौडेलले सत्तालाई सम्पूर्ण रुपमा दुरुपयोग गरेर यो मुद्दा उठ्न नदिन, गुपचुप गर्न, ढाकछोप गर्न, प्रमाण लुकाउन सम्पूर्ण रुपमा अहिलेको सत्तारुढ गठबन्धन लागेको आरोप लगाएका छन् । हामीले संसदीय समिति गठन गरेर जसमाथि छानबिन गर्न खोजिएको हो, त्यो व्यक्तिलाई तपाईंले राजीनामा दिनुपर्दैन भनेर फकाएर, तपाईं जुन कुर्सीमा बसिरहनुभएको छ, तपाईँमाथि छानबिन हुँदाहुँदै पनि तपाईं त्यस कुर्सीमा बसिरहन पाउनुहुन्छ ?,’ उनले भने । 

राजनीतिमा नैतिकता व्यक्तिसँग निर्भर गर्ने कुरा हो । कोही व्यक्ति नांगै छ र पनि कपडा लगाएको ठान्छ भने त्यसमा हाम्रो केही लाग्दैन । त्यसैले संसदले छानबिन समिति गठन गर्याे । त्यसपछि पनि नैतिकताको बोध नगरिने राजनीतिको अभ्यास नेपाली राजनीतिमा एउटा गम्भीर विषय हो । प्रतिगामी विषय हो । जसलाई छानबिन भइरहेको छ, त्यो व्यक्तिले नै सत्ता चलाउने त्यो खालको परिस्थिति अब कांग्रेसले रहन दिँदैन ।