प्रधानमन्त्रीले साथदिन भनेपछि गोजीबाट राजीनामा नझिकि फर्किए रास्वपाका मन्त्रीहरू

२० असार, काठमाडौं । राजीनामा दिने मनस्थिति बनाएर प्रधानमन्त्री निवास बालुवाटार पुगेका राष्ट्रिय स्वतन्त्र पार्टी (रास्वपा)का मन्त्रीहरू त्यसै फर्किएका छन् । मन्त्री भएदेखि गोजीमा राजीनामा बोकेर हिँडेको बताउने रास्वपाका मन्त्रीहरूले आज पनि बुझाउन सकेनन् । 

राजीनामा दिने तयारीका साथ मन्त्रीहरू बालुवाटार पुगेका थिए । तर, प्रधानमन्त्री प्रचण्डसँगको छलफल पछि उनीहरू राजीनामा नदिएर फर्किएका हुन । अब प्रधानमन्त्री पदमा रहेसम्म उनीहरुले साथ दिने भएका छन् । प्रधानमन्त्री प्रचण्डले आफूले संसदबाट विश्वासको मत लिने र सहयोग गर्न भनेपछि राजीनामा नदिने निर्णयमा पुगिएको रास्वपाका प्रमुख सचेतक सन्तोष परियारले जानकारी दिए ।
 
रास्वपाका मन्त्रीहरूसहित प्रमुख सचेतक सन्तोष परियारलगायत बिहीबार बिहान बालुवाटार पुगेका थिए । उनीहरूले प्रधानमन्त्री प्रचण्डलाई संसदबाट छिटो विश्वास मत लिन आग्रह गर्दै त्यो बेलासम्म आफूहरूले साथ दिने बताए । प्रधानमन्त्रीले संवैधानिक अधिकार प्रयोग गर्छु, संसदलाई फेस गर्छु तपाईंहरूले मलाई साथ दिनुपर्छ भनेका थिए । 

प्रचण्डको नेतृत्वको संघीय सरकारमा रास्वपाबाट सभापति रवि लामिछाने उपप्रधान तथा गृहमन्त्री छन्। उपसभापति डोलप्रसाद अर्याल श्रममन्त्री, सांसद सुमना श्रेष्ठ, शिक्षामन्त्री र विराजभक्त श्रेष्ठ खेलकुद मन्त्री छन् । यसअघि बुधबार साँझ प्रधानमन्त्रीलाई भेटेर नेकपा एमालेका मन्त्रीहरूले सामूहिक रूपमा राजीनामा दिएपछि रास्वपाका मन्त्रीहरूले पनि राजीनामा दिने मनस्थिति बनाएका थिए ।