प्रदेशले सिफारिस गरेका नेतालाई केन्द्रीय सदस्य बनाउने एकीकृत समाजवादीको निर्णय

२३ असार, काठमाडौं । नेकपा एकीकृत समाजवादीले प्रदेशबाट नाम सिफारिस भएर आए नामबाट थप केन्द्रीय सदस्य बनाउने भएको छ । आइतबार बसेको केन्द्रीय कमिटीको बैठकले प्रदेशका इन्चार्ज र सचिवहरुसँग केन्द्रीय कमिटी सदस्य बनाउन सकिनेहरुको नाम पठाउन निर्देशन दिएको छ । 

केन्द्रीय कमिटी बैठकले सबै प्रदेश र जिल्लाबाट क्लस्टर मिलाएर केन्द्रीय सदस्यका लागि नाम दिन प्रदेश इन्चार्जहरुलाई आग्रह गरेको हो । बैठकले पूर्णता दिनका लागि प्रदेशका यस भन्दा पहिला इन्चार्ज भएकाहरुलाई यथावत गर्दै प्रदेशका इन्चार्ज र सचिवहरु र यो केन्द्रीय कमिटीमा भएका सदस्यहरुको परामर्शमा प्रदेश र जिल्लाबाट क्लस्टर मिलाइ आवश्यक व्यवस्था गरी केन्द्रीय सदस्यहरुमा मनोनयन गर्ने ड्राफ्ट तयार गर्न जिम्मेवारी दिइएको छ ।  

प्रदेशस्तरबाट नामहरु आएपछि त्यसलाई केन्द्रीय कमिटीले निर्णय गर्नेछ । असार १६ देखि २० गतेसम्म काठमाडौंमा भएको दशौं राष्ट्रिय महाधिवेशनले अध्यक्षमा माधवकुमार नेपाल, सम्मानित नेतामा झलनाथ खनाल र महासचिवमा घनश्याम भूसालको नाम मात्र टुंगो लगाएको छ । केन्द्रीय कमिटीलाई पूर्णता दिने म्याण्डेट सचिवालयलाई दिएको थियो ।

सोही म्याण्डेट अनुसार पहिलेका पोलिटब्यूरो सदस्यहरुलाई स्वतः केन्द्रीय सदस्य बनाउने निर्णय भएको छ । त्यसरी बनेको ९३ जनाको केन्द्रीय कमिटीले थप केन्द्रीय सदस्य चयन गर्न प्रदेशका इन्चार्ज, सचिव र केन्द्रीय सदस्यहरुलाई दिएको हो ।