रुकुम पश्चिममा बाढीले घर बगाउँदा ३ बालिकाको मृत्यु, ७ जना घाइते

१ साउन, सुर्खेत । रुकुम पश्चिमको आठबिसकोटमा गएराति आएको बाढी र पहिरोले ठूलो जनधनको क्षति भएको छ । भूकम्पपछि बनाइएको अस्थायी टहरामा बाढी पस्दा तीन जना बालिकाहरूको मृत्यु भयो भने अन्य ७ जना घाइते भएका छन् । मृत्यु हुनेमा ८ वर्षीय हितमाया पुन, ५ वर्षीय धनिसा पुन र ४ वर्षीय मनिषा सार्की रहेका छन् । घटनामा ७ जना घाइते भएका छन् ।

घाइते हुनेहरूमा १२ वर्षीय विनय सार्की, २२ वर्षीय मनीषा पुन, २९ वर्षीय जनक खत्री, ६ वर्षीय मनसरी पुन, चार वर्षीय मेक्सन पुन, २८ वर्षीय धनमाया पुन र ६५ वर्षीय कल्पना कामी रहेका छन् ।घाइतेहरूको आठबीसकोट नगर अस्पताल राडीमा उपचार भइरहेको जिल्ला प्रहरी कार्यालय रुकुम पश्चिमले जनाएको छ । त्यसैगरी डिल्लीबहादुर डाँगी बेपत्ता भएका छन् । उनको खोजी कार्य पनि भइरहेको छ ।

जिल्ला प्रहरी कार्यालय रुकुम पश्चिमका सूचना अधिकारी, प्रहरी निरीक्षक बखत बहादुर शाहीले दिएको जानकारी अनुसार आठबिसकोट नगरपालिका–१२ झिमचौरमा माथिबाट आएको झिमचौर र तातोपानी खोलाको बाढीले स्थानीय शेरबहादुर पुनको अस्थायी टहरा बगाएको थियो । उनको घरमा ७ जना बसिरहेका थिए । ७ मध्ये तीनको मृत्यु भएको हो । घटना पश्चात् जिल्ला सदरमुकामबाट नेपाल प्रहरी, नेपाली सेना, सशस्त्र प्रहरीको टोली बिहानै घटनास्थलमा पुगेको छ ।