सांसदको प्राधिकरणका महानिर्देशकलाई प्रश्न, तपाई आएपछि ७ वटा दुर्घटना भए, जिम्मेवारी लिनु पर्दैन ?

१० साउन, काठमाडौं । संसदको पर्यटन तथा अन्तर्राष्ट्रिय सम्बन्ध समितिले सौर्य एयरलाइन्सको जहाज दुर्घटनाबारे छलफल गरेको छ । समितिले सरोकारवालासँग छलफल गरेको हो । छलफलमा नागरिक उड्डयन प्राधिकरणका महानिर्देशक प्रदीप अधिकारी लगायत छन् । तर, उनले दुर्घटनाको विषयमा छानबिन समिति बनिसकेकोले आफूले बोल्न नमिल्ने बताएका छन् । 

बिहीबार पर्यटन तथा अन्तर्राष्ट्रिय सम्बन्ध समितिका सभापति राजकिशोर यादवले सौर्य एयरलाइन्सको दुर्घटनाको विषयमा अधिकारीलाई प्रश्न गरेका थिए । सो प्रश्नको जवाफमा सो घटना छानबिनका लागि सरकारले ५ सदस्यीय छानबिन आयोग गठन गरिसकेकोले आफूले यस विषयमा बोल्न उचित नहुने अधिकारीले जवाफ फर्काएका छन् । सांसदहरूले उनीमाथि प्रश्न गरिरहे । 

बैठकमा सांसद उदयशमशेर जबराले महानिर्देशक अधिकारीको क्षमतामाथि प्रश्न उठाए । अधिकारीले प्राधिकरणको नेतृत्व सम्हाले यता मात्र ७ वटा हवाई दुर्घटनामा परिसकेको तथ्य पेस गर्दै उनले अधिकारीलाई जिम्मेवारी लिन आग्रह गरे । यसको जिम्मेवारी लिनुपर्दैन ? दोष जति सधैँ अरूलाई नै लगाउने ?’ उनले थप प्रश्न गरे ।   

राणाले भने, ‘नेपाली आकाशमा आन्तरिक मात्र होइन विदेशी जहाजहरू पनि दुर्घटनामा परेका छन् । सन् १९९६ यता साना ठूला ६० वटा जहाज दुर्घटनामा परिसकेका छन् । यसमा विदेशी जहाज समेत ८ वटा परे । आन्तरिक त सबै जसो एयरलाइन्स कम्पनीहरूका जहाज दुर्घटनामा परेका छन्’ जबराले भने, प्राधिकरणमा तपाईँकै नेतृत्व यता मात्र ७ वटा जहाज दुर्घटनामा परिसकेका छन् ।