माधव नेपालले दिए पार्टी फुटाउने कोसिस भइरहेको संकेत

१० साउन, काठमाडौं । नेकपा एकीकृत समाजवादीका अध्यक्ष माधवकुमार नेपालले आफ्नो पार्टीविरुद्ध षड्यन्त्र भइरहेको भन्दै कतैबाट पार्टी फुटाउने प्रयास भइरहेको संकेत दिएका छन् । उनले केन्द्रीय कमिटीको बैठकमा सुनेको कुरा सत्य भए षडयन्त्र गम्भीर खालले अगाडि बढेको जानकारी दिएका छन् । उनले कस्तो षडयन्त्र भनेर नखुलाए पनि पार्टीलाई विभाजन गराउने खेल भइरहेको प्रति नेताहरूमा संकेत गरेका छन् ।    

बिहीबार पार्टी केन्द्रीय कार्यालय आलोकनगरमा बसेको केन्द्रीय कमिटीको बैठकमा उनले पार्टीविरुद्ध विभिन्न षड्यन्त्र भइरहेको कुरा पनि सुन्नमा आएको बताए । पार्टीविरुद्ध षड्यन्त्र सुरु भएको र त्यसको गहन विश्लेषण गरेर जानकारी हासिल गरी पूर्ण सतर्कता अपनाउनुपर्ने अवस्था आएको उनको भनाइ थियो । उनले भने, ‘हाम्रा विरुद्धमा अनेकौं किसिमका षडयन्त्रका तानाबानाहरू बुनिँदै छन् भन्ने कुरा पनि सुन्नमा आइरहेको छ । कति सत्य हो, कति असत्य हो? थाहा छैन ।’

उनले सुनेका वा अरूले सुनाएका सबै कुरा असत्य नहुने बताए । यसबारे सबैले गहन रुपमा अनुसन्धान गर्नुपर्ने उनले बताए । उनले नेताहरूले यो विषयमा जानकारी लिनुपर्ने बताए । जानकारी लिएर यस विषयमा आफ्नो तर्फबाट पूर्ण सतर्कता अपनाउनुपर्ने विभिन्न राजनीतिक दलहरूसँग, राजनीतिक शक्तिहरूसँग संवाद गर्नुपर्ने बताए ।