सहकारीको रकम ठगेर विदेश भागेकालाई तत्काल नेपाल फर्काउन गृहमन्त्रीलाई समितिको निर्देशन

१४ साउन, काठमाडौं । सरकारी संस्थाको बचत अपचलन र ठगी सम्बन्धमा छानबिन गर्न गठित संसदीय छानबिन समितिले सरकारलाई विदेशमा भागेर लुकेका ठगहरूलाई समातेर नेपाल फिर्ता गर्न निर्देशन दिएको छ । सहकारीको रकम अपचलन गरी देश बाहिर भागेका १८ जनालाई तत्काल कुनै पनि माध्यमबाट स्वदेश फर्काउन गृहमन्त्री रमेश लेखकलाई समितिले निर्देशन दिएको हाे ।

सोमबार बसेको समितिको बैठकले गृहमन्त्री रमेश लेखक तथा गृहसचिव एकनारायण अर्यालसँग छलफल गरेपछि देश बाहिर फरार भएका १८ जनालाई स्वदेश फर्काउने व्यवस्था गर्न निर्देशन दिएको हो । बैठकले सहारा, सूर्यदर्शन लगायतका सहकारीको रकम अपचलनमा संलग्न रहेको आरोप लागेका जीबी राईलगायतलाई तत्काल स्वदेश फर्काउन निर्देशन दिएको हो ।

सूर्यदर्शनका ज्ञानबहादुर बम्जन, थानबहादुर राई, भुपेन्द्र राई, सानोपाइलाका तस्विरन खातुन र अश्रफ अली, सहारा तथा सुप्रिमका सुवास केसीलाई पनि झिकाउन भनिएको छ । सुमेरु सहकारीको रकम अपचमलनमा संलग्न भएको आरो लागेका भरत महर्जन, उनको श्रीमती माजमाया, छोरा सचिन र छोरी सरलालाई पनि तत्काल नेपाल ल्याउन भनिएको छ ।

यस्तै शिव शिखरका तेजबहादुर बम्जन तामाङ, इमेज सहकारीका अध्यक्ष देवकुमार नेपाली र उनकी श्रीमती छेदा, व्यवस्थापक दिपक पौडेल, शिवशिखर सहकारीका लीलानाथ गौतम, कान्तिपुर सेभिङका प्रेमध्वज लामा र मेघाड्रिमका महाशंकर रेग्मीलाई पनि स्वदेश फर्काउन र छानबिन समितिको दायरामा ल्याउन गृहमन्त्रीलाई निर्देशन दिएको छ ।

समितिले सहकारीको मुद्दामा थुना वा प्रहरी हिरासतमा रहेका २४ जनासँग सोधपुछ गर्ने निर्णय पनि गरेको छ । त्यसको सूची गृहमन्त्रीलाई दिएको र कारागारमा भएकाहरूसँग सोधपुछ गर्न आवश्यक जनशक्ति र समय प्रबन्ध गर्न गृहमन्त्री र सचिवलाई निर्देशन दिएको समितिले जनाएको छ ।