कसैलाई जोगाउन प्रहरी संगठनको दुरुपयोग गरिन्न, सरुवा र बढुवा नीति अनुसार हुन्छः गृहमन्त्री लेखक

१६ साउन, काठमाडौं । गृहमन्त्री रमेश लेखकले प्रहरीको सरुवालाई सरुवाकै रुपमा अगाडि बढाइने बताएका छन्  । उनले प्रहरी प्रशासन कसैलाई जोगाउन वा नजोगाउन दुरुपयोग हुन नदिने प्रतिबद्धता व्यक्त गरेका छन् । प्रतिनिधिसभाको बुधबार बसेको राज्य व्यवस्था तथा सुशासन समितिको बैठकमा केही सांसदले प्रहरी सरुवाबारे उठाएका प्रश्नको जवाफ दिने क्रममा उनले यस्तो बताएका हुन् । 

जवाफ दिने क्रममा गृहमन्त्री लेखकले सरुवालाई सरुवाकै रुपमा लिन आग्रह गरे । कर्मचारी सरुवा हुन्छ, सरुवालाई सरुवाकै रुपमा बुझ्दा सहज हुन्छ । भर्खर २०-२१ जना सचिवको सरुवा भएको छ । ९१ जना न्यायाधीशको सरुवा भएको छ, अरु गर्न बाँकी नै छ, उनले भने । उनले प्रहरी संगठन र प्रशासनलाई दुरुपयोग भने हुन नदिने प्रतिबद्धता उनले जनाए । कसैलाई जोगाउन वा नजोगाउन प्रहरी संगठन र प्रशासनको दुरुपयोग हुन नदिने उनकाे दावी थियाे । 

लेखकले नेपाल प्रहरी ऐन, २०१२ लाई नयाँ विधेयकको रूपमा छिट्टै संसदमा पेस गर्ने बताए । उनले प्रहरीको संगठन सुदृढ गर्न, मुलुकमा न्याय व्यवस्था, विधिको शासन कायम गर्न नेपाल प्रहरीको नयाँ कानुन निर्माण गर्ने तयारीमा सरकार रहेको स्पष्ट पारे । उनले सरकारले सशस्त्र प्रहरी बल, नेपाल ऐनलाई पनि समसामयिक बनाउने गरी नयाँ विधेयक संसद्मा पेस गर्ने भएकाले त्यसलाई गम्भीर र अर्थपूर्ण रूपमा छलफल गरेर निष्कर्षमा पुर्याउने बताए । 

मुलुकको शान्ति सुरक्षा र अमनचैन कायम हुने गरी सरकारले कानुन निर्माणको कामलाई प्राथमिकता दिएको गृहमन्त्री लेखकको भनाई थियो । अहिले प्राथमिकता भनेको केही कानुनहरूको निर्माण र देशमा शान्ति सुरक्षा कायम गर्नका लागि, अमनचैन स्थापित गर्नका लागि, सुशासनको प्रत्याभूति र सुनिश्चितता गर्नका लागि केही कानुनहरू नयाँ निर्माण गर्नुपर्ने उनले बताए । 

नेपाल प्रहरी ऐन २०१२ सालदेखि अहिलेसम्म त्यही कानुनले काम चलाइराखेको र धेरै संशोधनहरू भए पनि त्यही अवस्थामा राख्न सक्ने अवस्था छैन । आजको दिनमा एउटा नयाँ प्रहरी कानुन चाहिन्छ । प्रहरी ऐन २०१२ नयाँ विधेयकको रूपमा प्रस्तुत गर्ने हाम्रो तयारी छ । त्यसरी नै सशस्त्र प्रहरी बल, नेपालको कानुन पनि धेरै पुरानो नभएपनि हामीले २०५८ सालमा प्रारम्भ गरेको हो, उनले भने । 

गृहमन्त्री लेखकले कर्मचारी सरुवा हुने कुरालाई सामान्य रूपमा लिन पनि सांसदहरूलाई आग्रह गरे । सरुवालाई सरुवाको रूपमा बुझ्दा सही हुने र त्यसले देश र जनताको पक्षमा काम गर्न सरकारलाई पनि सहयोग पुग्ने उनले बताए ।