२५ सदस्यीय बन्यो ओलीको मन्त्रिपरिषद, कांग्रेसबाट रुपा र पूर्णबहादुरले पाए राज्यमन्त्री

१८ साउन, काठमाडौं । ओली नेतृत्वको मन्त्रिपरिषद विस्तार भएको छ । नेपाली कांग्रेसकी सबैभन्दा कान्छी केन्द्रीय सदस्य रुपा बिक वन तथा वातावरण राज्यमन्त्री बनेकी छन् । उनीसहित नाउपाका अरुणकुमार चौधरी र कांग्रेसकै पूर्णबहादुर तामाङ राज्यमन्त्री भएका छन् । 

उनीहरुको आज शपथ गराउने तयारी हुँदैछ । विक वन तथा वातावरण राज्यमन्त्री, चौधरी संस्कृति, पर्यटन राज्यमन्त्री र तामाङ ऊर्जा राज्यमन्त्री नियुक्त भएको राष्ट्रपति कार्यालयले जानकारी दिएको छ । सत्तारुढ घटक कांग्रेस र एमालेले मन्त्रिपरिषद्लाई समावेशी र अन्य दललाई पनि समेट्नका लागि राज्यमन्त्री थप्नेका हुन् । 

प्रधानमन्त्री केपी शर्मा ओली शपथ लिएकै दिन २२ सदस्यीय मन्त्रिपरिषद् गठन भएको थियो । अब मन्त्रिपरिषद् २५ सदस्यीय भएको छ । संविधान अनुसार मन्त्रिपरिषद् २५ सदस्यीय भन्दा ठूलो बनाउन पाइँदैन ।संविधानअनुसार अब मन्त्रिपरिषदले पूर्णता पाएको छ ।