लिविया झडपमा नौ जनाको मृत्यु, १६ जना घाइते

२७ साउन, त्रिपोली । लिवियामा प्रतिद्वन्द्वी दुई समूहबीच भएको झडपमा परी नौ जनाको मृत्यु भएको छ भने १६ जना घाइते भएका छन् । 

लिबियाको स्वास्थ्य मन्त्रालयको आपतकालीन विभागका प्रवक्ता ओसामा अलीले शनिबार घटनाको पुष्टि गरेको छ । उनले सङ्ख्या उल्लेख नगरिकन केही हताहत भएको आफूलाई जानकारी प्राप्त भएको बताएको छ । 

प्रवक्ता अलीले सिन्ह्वालाई दिएको जानकारीअनुसार ट्राजुरा जिल्लामा भएको झडपका कारण दर्जनौं परिवार सुरक्षाका कारण विस्थापित भई आफन्त कहाँ शरण लिनपुगेका छन् । 

सन् २०११ मा मध्यपूर्वका अन्य छिमेकी देशहरू इजिप्ट, ट्युनिसिया, बहराइन र यमनमा सरकारविरोधी प्रदर्शन भएसँगै लिबियामा पनि सरकारविरोधी आन्दोलन चर्केको थियो । सो प्रदर्शनलाई फ्रान्स, अमेरिका र बेलायतसहितका अन्तर्राष्ट्रिय शक्तिकेन्द्रको समर्थन र सहयोग रहेको थियो । 

नेटो गठबन्धनको सेनालाई लिबिया आक्रमणमा खटाइएको थियो । निरन्तर नेटो गठबन्धनले आक्रमण गर्दै गद्दाफीको शासनलाई कमजोर पारेको र गृहनगर सिर्तमा भएकै आक्रमणमा गद्दाफी मारिएको थियो । 

नेता मुअम्मर गद्दाफीको पतन देखि नै हिंसा र राजनीतिक अस्थिरता रहेको छ । तत्कालिन सरकारका सेना र विद्रोहीसमूहबीचको आन्दोलन गृहयुद्धमा परिणत भएपछि बनेका समूहहरूबीचको सङ्घर्षका कारण दर्जनौँ साना समूहको जन्म भएको र बेलाबेला उनीहरूबीच नै झडपका घटना हुने गरेका छन् ।