यातायात कार्यालय पर्साले एक वर्षमा वितरण गर्यो ३० हजार ६ सय नयाँ लाइसेन्स

२८ साउन, वीरगंज । यातायात व्यवस्था कार्यालय वीरगंजबाट एक वर्षमा ३० हजार ६ सय भन्दा बढी नयाँ सवारी चालक अनुमतिपत्र वितरण भएको छ । गत आर्थिक वर्ष २०८०-०८१ मा कार्यालयले विभिन्न समूहका नयाँ र थप गरी ३० हजार ६ सय ११ जनालाई सवारी चालक अनुमतिपत्र वितरण गरेको हो ।  

नयाँ र थप गरी ५३ हजार ५७१ जनाले सवारी चालकका लागि अनुमतिपत्रका लागि आवेदन दिएकोमा ३० हजार ६ सय ११ जना लिखित र प्रयोगात्मक 'ट्रायल' परीक्षामा उत्तीर्ण हुँदै अनुमतिपत्र प्राप्त गरेको कार्यालयका प्रमुख कमल गौतमले जानकारी दिए । यातायात कार्यालय पर्साबाट आवेदन भरेका मध्ये करिब ५७ प्रतिशतले चालक अनुमतिपत्र प्राप्त गरेको तथ्यांकले देखाएको हो । 

जसमा सबैभन्दा धेरै मोटरसाइकलको चालक अनुमतिपत्र वितरण भएको छ । ११ हजार ४ सय ४४ वटा नयाँ मोटरसाइकल चालक अनुमतिपत्र वितरण भएको छ भने समूह थपमा मोटरसाइकलकै १ हजार १ सय ५१ वटा चालक अनुमति पत्र वितरण भएको कार्यालयले उपलब्ध गराएको तथ्याङ्कमा उल्लेख छ ।  

यस्तै कार जिप, डेलिभरी भ्यान तर्फ ४ हजार ६६ नयाँ र थप तर्फ ६ हजार ७ सय २ वटा अनुमति पत्र जारी भएको छ भने स्कुटरको २ हजार २३ नयाँ र ३७ वटा थप गरी २ हजार ६० वटा जारी भएको छ । गएको आर्थिक वर्षमा मिनी बस, मिनी ट्रक तथा ट्रक, बस र लहरीको अनुमति पत्रका लागि आवेदन माग नहुँदा यसको अनुमति पत्र वितरण नभएको कार्यालय प्रमुख गौतमले बताए ।

यस्तै नयाँ र थप गरी डोजर ९, रोडरोलर ८, क्रेन १०४, दमकल ३४, लोडर ६०, स्काभेटर १७१, भ्याकुमलोडर २१३, ग्रेडर २३ र फोर्कलिफ्ट ५९ वटा अनुमति पत्र वितरण भएको छ । यस्तै ७ सय ८५ वटा प्रतिलिपी वितरण भएको छ भने २० हजार ५४१ वटा अनुमति पत्र नवीकरण भएको छ । 

कार्यालयले गएको आर्थिक वर्षमा सवारी चालक अनुमति पत्र नयाँ र थप तथा नवीकरण, प्रतिलिपि लगायत सवारी दर्ता किताब सम्बन्धी दस्तुरबाट ३४ करोड २४ लाख ९० हजार १ सय ७२ रुपैयाँ संकलन समेत गरेको छ ।