मानवबेचविखन गरेको आरोपमा नेपाल संगीत उद्योग संघको केन्द्रीय कार्यालयमा प्रहरीको छापा

५ भदौ, काठमाडौं । प्रहरीको मानवबेचविखन अनुसन्धान ब्यूरोको टोलीले नेपाल संगीत उद्योग संघको केन्द्रीय कार्यालयमा छापा मारेको छ । अनामनगरस्थित कार्यालमा बुधबार छापा मारेको ब्यूरोका एसपी गौतम मिश्रले जानकारी दिए ।

मानवबेचविखन गरेको उजुरीका आधारमा संगीत उद्योग संघको कार्यालयमा ब्यूरोले छापा मारेको बताइएको छ । बुधबार दिउँसो पुगेको प्रहरी टोलीले संघको कार्यालयबाट केही कागजात र कम्प्युटर बरामद गरेको छ ।

नक्कली कागजात बनाएर मानिसहरुलाई विदेश पठाउने गरेको सूचना पाएपछि अनुसन्धानका लागि ती कागजात र कम्प्युटर बरामद गरेको ब्यूरोले जनाएको छ । संगीत उद्योग संघका पदाधिकारीको रोहबरमा छापा मारेको ब्यूरोले जनाएको छ । 

गैरसंगीतकर्मी र कलाकारलाई मोटो रकम असुल गरेर विभिन्न देश पठाउने गुनासो आएपछि ब्युरोले छापा मारेको हो । एसपी मिश्रका अनुसार अहिले कार्यालयमा भएका कागजात हेर्ने काम भइरहेको छ ।