युक्रेनले रुसमाथि गर्‍यो १४४ ड्रोनबाट आक्रमण

२५ भदौ, काठमाडौं । युक्रेनले रुसमाथि १४४ ड्रोन आक्रमण गरेको छ । आक्रमणमा धेरै आवासीय भवनहरूलाई पनि निशाना बनाइएको मिडिया रिपोर्टमा उल्लेख छ । रुसको राजधानी मस्को वरपर २० वटा ड्रोन खसालेका छन् । यस आक्रमणमा एक महिलाको पनि मृत्यु भएको बताइएको छ ।

आक्रमणमा दर्जनौं घर ध्वस्त भएका छन् । यस आक्रमणका कारण मस्को र वरपरका विमानस्थलबाट ५० भन्दा बढी उडानहरू डाइभर्ट गर्नुपरेको थियो । रुसी अधिकारीका अनुसार मस्कोका ४ मध्ये ३ वटा विमानस्थल ६ घण्टाभन्दा बढी बन्द गर्नुपरेको थियो ।
 
रुसले पनि अन्य ८ प्रान्तमा १२४ ड्रोन खसालेको छ । यस हमलाको बदला लिँदै रुसले युक्रेनमा ४६ ड्रोनबाट पनि आक्रमण गरेको बताइएको छ । यद्यपि युक्रेनका अनुसार उसले यी मध्ये ३८ वटा ड्रोनलाई खसालेको छ ।

यसअघि ३१ अगस्टमा युक्रेनले रुसमाथि १५० भन्दा बढी ड्रोनबाट हमला गरेको थियो । साढे दुई वर्ष लामो रुस–युक्रेन युद्धमा पहिलो पटक युक्रेनले रुसमाथि यति ठूलो संख्यामा ड्रोन हमला गरेको थियो । त्यसबेला पनि युक्रेनले राजधानी मस्कोलाई निशाना बनाएको थियो । 

मस्कोका मेयर सर्गेई सोब्यानिनका अनुसार शहरमा ११ वटा ड्रोनले आक्रमण गरेको थियो । यी आक्रमणमा एक तेल प्रशोधन केन्द्र र प्राविधिक कोठालाई निशाना बनाइएको थियो । तेल प्रशोधन केन्द्रमा आक्रमणपछि विस्फोट भएको थियो । यसपछि बाक्लो धुवाँ उठेको देखियो । रुसी अधिकारीका अनुसार युक्रेनले १५ प्रान्तमा १५८ ड्रोनबाट आक्रमण गरेको थियो । रुसी एयर डिफेन्सले लगभग सबै ड्रोनलाई रोकेर खसालेको थियो ।

युक्रेनी राष्ट्रपति भोलोडिमिर जेलेन्स्की अब रुसमा थप घुसेर आक्रमण गर्न चाहन्छन् । समाचार एजेन्सी रोयटर्सका अनुसार उनीहरूले यसका लागि अमेरिकालाई सहयोगका लागि दबाब पनि दिइरहेका छन् । जेलेन्स्कीले अगस्त ३१ मा एक भिडियो जारी गर्दै युक्रेनले रुसी एयरफिल्ड र सैन्य अड्डाहरूलाई निशाना बनाएमा मात्र यी आक्रमणहरू रोक्न सकिने बताएका थिए ।