सहकारीका विषयमा उपसभापति गुरुङमाथि छानबिन हुन्छ, डिभोर्सबारे संसदमा बहस गर्न आवश्यक छैनः कांग्रेस

२६ भदौ, काठमाडौं । नेपाली कांग्रेसले कानुनी रुपमा गरेको सम्बन्ध विच्छेदको विषय संसदमा बहसको विषय हुन नसक्ने बताएको छ । बुधबार बिहान पार्टी सभापति देउवा निवास बुढानिलकण्ठमा बसेको पदाधिकारी र शीर्ष नेताको बैठकले उपसभापति धनराज गुरूङको डिभोर्सबारे संसदमा बहसको विषय नहुने बताएको हो । 

कांग्रेसले सहकारी ठगीमा नाम जोडिएका गुरुङमाथि छानबिन गर्न तयार भएको बताएको छ । पदाधिकारी बैठकपछि प्रमुख सचेतक श्याम घिमिरेले गुरुङ स्वयंले केही गल्ती भए छानबिनमा सहयोग गर्न आफू तयार रहेको बताएको जानकारी दिए । उनले कानुनीरुपमा डोभर्स भइसकेपछि त्यो सक्कली हो या नक्कली भनेर विषय उठान गर्नु अनुचित हुने बताए । 

उनले सहकारीको रकम अपचलन गरेको  विषयमा भने गुरूङमाथि छानबिन गर्न कांग्रेस तयार रहेको बताए । गल्ती गरेको हो भने गुरूङ आफैले सजाय भोग्नुपर्ने उनको भनाइ छ । सहकारीको रकम अपचलनको आरोप लागेपछि उपसभापति गुरूङमाथि छानबिन हुनुपर्ने कांग्रेसको भनाइ हो ।