उपसभामुख हटाउने चर्चाकाबीच कांग्रेस सांसदहरूलाई उपत्यका नछाड्न निर्देशन

२६ भदौ, काठमाडौं । नेपाली कांग्रेसले आफ्ना सांसदहरूलाई आगामी असोज ३ गतेसम्म काठमाडौं नछाड्न निर्देशन दिएको छ । कांग्रेस संसदीय दलका प्रमुख सचेतक श्याम घिमिरेले बुधबार सबै सांसदहरुलाई सूचना पठाउँदै असोज ३ गतेसम्म काठमाडौं उपत्यका बाहिर नजान ह्वीप जारी गरेको हो । उपत्यका बाहिरकालाई पनि तत्कालै काठमाडौं फर्किन निर्देशन दिइएको कांग्रेसका एक सांसदले बताए ।

उपसभामुख इन्दिरा राना मगरलाई दुईतिहाइ सांसदले हटाउने चर्चाकाबीच कांग्रेसले आफ्ना सांसदहरुलाई उपत्यका नछाड्न निर्देशन दिइएको हो ।  बुधबार बसेको कांग्रेसको पदाधिकारी तथा पूर्वपदाधिकारी बैठकले उपसभामुख इन्दिरा राना मगरलाई राजीनामा दिन आग्रह गर्ने निर्णय गरेको छ ।