शैक्षिक प्रमाणपत्रबारे प्रश्न उठेका श्रीलंकाका लागि प्रस्तावित राजदूत भट्टराईको अनुमोदन अनिश्चित

६ असोज, काठमाडौं । संसदीय सुनुवाइ विशेष समितिले स्नातक तहको प्रमाणपत्र नभएर संसदीय अनुमोदन हुनबाट रोकिएका श्रीलंकाका लागि प्रस्तावित राजदूत रामकृष्ण भट्टराईका विषयमा निर्णय लिन ढिलाई गरेको छ । उनको प्रमाणपत्रबारे के गर्ने भन्ने अन्योल भएपछि आजका लागि बोलाइएको समितिको बैठक स्थगित गरिएको छ ।  
 
समितिका एक सदस्यले दिएको जानकारी अनुसार उहाँ (भट्टराई) को शैक्षिक प्रमाणपत्र छैन । राजदूत हुन स्नातक तह उत्रिण भएको हुनुपर्छ । तर, उनले फेरी समितिलाई सो प्रमाणपत्र उपलब्ध गराएका छैनन् । यसैले उनको अनुमोदन रोकिएको हो । फेरी समितिमा पनि सदस्यहरूबीच एकमत छैन । प्रस्तावित राजदूत भट्टराईको स्नातक तहको प्रमाणपत्र नभएपछि उनको नाम समितिबाट अनुमोदन हुन बाँकी थियो ।
 
यसअघि समितिले विभिन्न १६ देशका लागि प्रस्तावित राजदूतको नाम बहुमतले अनुमोदन गरेको थियो ।  भट्टराईको सर्टिफिकेट नभेटिएपछि निर्णय गर्नका लागि समितिमा अन्योलता सिर्जना भएको छ । उनले बायोडाटामा भने स्नातक तह उत्तीर्ण गरेको उल्लेख गरेका छन् ।  उनी नेपाली कांग्रेसको कोटाबाट राजदूतमा सिफारिस भएका थिए । राजदूतहरूको संसदीय सुनुवाइबाट पारित निर्णयमा भने दुई जना सांसदले फरक मत राखेका थिए । 

१७ देशको राजदूतका लागि सरकारले सिफारिस गरेका नाममध्ये १६ देशका प्रस्तावित राजदूतको नाम समितिले बिहीबार अनुमोदन गरेको थियो । त्यसमध्ये दक्षिण अफ्रिकाका लागि प्रस्तावित राजदूत प्रा कपिलमान श्रेष्ठ, इजरायलका धनप्रसाद पण्डित र मलेसियाका नेत्रप्रसाद तिम्सिनामा उच्च नैतिक चरित्र नभएकाले उनीहरूलाई राजदूतमा नियुक्त गर्न नहुने प्रस्ताव सांसद डोलप्रसाद अर्यालले राखेका थिए ।

 
त्यसैगरी अर्का सांसद प्रकाश अधिकारीले भारतका लागि राजदूतमा सिफारिस डा.शंकर शर्मा, दक्षिण अफ्रिकाका कपिलमान श्रेष्ठ, इजरायलका धनप्रसाद पण्डित नियुक्त हुन अयोग्य रहेको भन्दै फरक मत राखेका थिए ।