सत्ता पक्षका सांसदको असहमतिबीच पारित भयो सुदूरपश्चिम सरकारको बजेट

६ असोज, धनगढी । सांसदहरुको  असहमतिबीच सुदूरपश्चिम प्रदेश सरकारले ल्याएको बजेट प्रदेश सभाबाट पारित भएको छ । आर्थिक वर्ष ०८१/०८२ को बजेट बहुमतले पारित गरेको हो । आर्थिक मामिलामन्त्री बहादुरसिंह थापाले गत भदौ ३१ गते प्रदेशसभामा ३१ अर्ब ६२ करोड ९८ लाख २८ हजारको बजेट पेश गरेका थिए ।

यसअघिको सरकारले ल्याएको बजेट पारित हुन नसक्दा सुदूरपश्चिम दुई महिनादेखि बजेटविहीन थियो । छलफलका क्रममा बजेटमा सत्तारुढ दलकै सांसदहरूले असन्तुष्टि जनाएका थिए । तत्कालिन मुख्यमन्त्री दीर्घ बहादुर सोडारी नेतृत्वको सरकार अल्पमतमा परेपछि असार १ गते संसदमा प्रस्तुत भएको बजेट पास हुन नसकेपछि साउन १ गते देखि सुदूरपश्चिम प्रदेशमा बजेट शून्यताको अवस्था आएको थियो । 

बजेट पास नभएपछि प्रदेश सरकारले उठाउने यातायात कर, लिखित पाससम्बन्धी कर, स्थानीय तहहरूले लिने मनोरञ्जन करलगायतको कर संकलन कार्य शून्य भएको थियो । जसकारण प्रदेश सरकारलाई दैनिक एक करोडको राजश्व घाटा व्यहोर्नु परेको थियो ।

बजेट पारित हुनुअघि सांसदले उठाएका प्रश्नको जवाफ दिँदै आर्थिक मामिला मन्त्री थापाले आर्थिक अनुशासन र सुशासन कायम राखेर बजेट निर्माण गरिएको बताए । अहिलेको सरकारका केही प्राथमिकता समावेश गरेर अघिल्लो सरकारले बनाएको बजेटलाई परिमार्जन र पुनरावलोकन गरिएको उनको दावी छ ।