यो भन्दा बलियो अर्को सरकार बन्दैन: शेखर कोइराला

८ कात्तिक, विराटनगर । नेपाली कांग्रेसका वरिष्ठ नेता डा.शेखर कोइरालाले नेपालमा यो भन्दा बलियो सरकार नबन्ने भन्दै यही सरकारले विकासमा तीव्रता दिनुपर्ने बताएका छन् । उनले अहिलेको सरकारको काम भनेको जनताले दिएको म्यान्डेट अनुसार संविधानमा केही सुधार गर्ने, जनसेवा सहज बनाएर जनतामा आशा र भरोसा जगाउनुपर्ने बताएका छन् । 

नेपाल प्रेस युनियन मोरङ शाखाद्वारा आयोजित पत्रकार भेटघाटमा उनले मुलुकमा राजनीतिक स्थिरता कायम गर्न बनेको सरकारप्रति जनताको आशा र भरोसा रहेको दावी गरे । कांग्रेस र एमालेको गठबन्धन सरकार बनेपछि आम जनताले सरकारको कामले गति लिन्छ भन्ने सोचेको तर, त्यो अनुसार सरकारले काम गर्न नसकेको उनले बताए । 

बलियो सरकार भएर पनि परिणाम आएन, यसैले सरकारमाथि प्रश्न उठ्यो, उनले भने, सरकारसामु अप्ठ्यारा होलान्, हामी देख्न सक्छौं । तर दुई ठूला दल एक ठाउँमा आएपछि राजनीतिक स्थायित्व, आर्थिक विकास, संविधान संशोधन र सुशासनका कुरा अघि बढ्छन् भन्ने जनताको बुझाइ थियो । हामीले त्यही सोचेर गठबन्धन बनाएका हौँ र त्यही अनुसार सरकार अगाडि बढ्नुपर्छ । 

कांग्रेस र एमाले दुई ठूला दलको करिब दुईतिहाइ बहुमतको सरकार रहेको र दुईदलीय सरकारले राम्रो काम गर्नुपर्ने उनले बताए । उनले सरकारसँग कम समय भएकाले जनताका चासो र विकासमा तीव्रता दिनुपर्ने धारणा राखे । मुलुकका केही ठूला दलले प्रदेश संरचनालाई बलियो बनाउन नचाहेको उनको भनाइ थियो । 

नेता कोइरालाले मुलुकको समग्र विकासका लागि संघीयता आवश्यक रहेको बताउँदै संघीयतालाई बलियो बनाउन प्रदेशलाई अधिकार दिनुपर्ने धारणा राखे । दल विभाजन ऐन सरकारको प्राथमिकतामा नरहेको उनले स्पष्ट पारे । नेपालको परराष्ट्र नीतिमा एकरूपता हुनुपर्ने उनको धारणा थियो ।