महानगरका प्रमुख र उपप्रमुख पदका उम्मेदवारले ७ लाख ५० हजारसम्म खर्च गर्न पाउने

९ कात्तिक, काठमाडौं । निर्वाचन आयोगले उपनिर्वाचनमा स्थानीय तहका उम्मेदवारको खर्च सीमा तोकेको छ । आयोगले शुक्रबार विज्ञप्ति जारी गर्दै खर्चको सीमा तोकिदिएको हो । आयोगका प्रवक्ता नारायणप्रसाद सापकोटाका अनुसार महानगरपालिकाका प्रमुख तथा उपप्रमुख पदका उम्मेदवारका लागि सात लाख पचास हजार रुपैयाँ तोकिएको छ । 

उपमहानगरपालिकाका प्रमुख तथा उपप्रमुख पदका उम्मेदवारले पाँच लाख पचास हजार, नगरपालिकाका प्रमुख तथा उपप्रमुख पदका उम्मेदवारले चार लाख पचास हजार खर्च गर्न पाउने आयोगले जनाएको छ । गाउँपालिकाका अध्यक्ष तथा उपाध्यक्ष पदका उम्मेदवारले तीन लाख पचास हजार रुपैयाँ र जिल्ला समन्वय समितिका प्रमुख तथा उपप्रमुख पदका उम्मेदवारले जम्मा पचास हजार खर्च गर्न सक्नेछन् । 

महानगरपालिकाका वडा अध्यक्षका उमेदवारले तीन लाख रुपैयाँ, उपमहानगरपालिकाका वडा अध्यक्ष उमेदवारले दुई लाख पचास हजार रुपैयाँसम्म खर्च गर्न पाउनेछन् । नगरपालिकाका वडा अध्यक्षका उमेदवारले दुई लाख रुपैयाँ र गाउँपालिकाका वडा अध्यक्ष पदका उमेदवारले एक लाख पचास हजार रुपैयाँसम्म खर्च गर्नसक्ने गरी हद तोकिएको निर्वाचन आयोगले जनाएको छ । आगामी मंसिर १६ गते स्थानीय तहका रिक्त पदमा उपनिर्वाचन हुँदै छ ।