दुई दलीय व्यवस्था बनाउन प्रधानमन्त्रीले हामीलाई सिध्याउने बाटो खोजिरहेका छन्ः नेपाल

१२ कात्तिक, पोखरा । नेकपा एकीकृत समाजवादीका अध्यक्ष माधवकुमार नेपालले प्रधानमन्त्री केपी शर्मा ओली विपक्षी सिध्याउने रणनीतिमा लागेको बताएका छन् । उनले दुई दलीय व्यवस्थाका लागि अध्यादेश ल्याउन लागेको र यो कांग्रेस–एमालेको फाइदाका लागि भएको दावी गरेका छन् । उनले एमालेसँग पार्टी एकताको कल्पना गर्न नसकिएपनि माओवादीसँग एकता हुन सक्ने बताएका छन् । 

समाजवादी प्रेस संगठन नेपाल कास्कीद्वारा सोमबार पोखरामा आयोजित पत्रकार भेटघाट कार्यक्रममा उनले यसअघि सरकारले आवश्यकताका लागि अध्यादेश ल्याएको तर, यो पटक दल सिध्याउन अध्यादेश लयउन लागिएको बताए । अहिले आवश्यकभन्दा पनि पूर्वाग्रहका साथ ल्याउन लागिएको हो । उ बेला पार्टीभित्रको ठूलो हिस्सा अन्यायमा परेको थियो । जनता सडकमा उत्रिएका थिए । त्यस बेला न्याय चाहिएको थियो । अहिले कुनै बाध्यता छैन । स्थिति छैन । तर, सरकारलाई बाँकी दल फुटाउनु छ, उनले भने । 

नेपालको राजनीति मौसम जस्तै पूर्वानुमान गर्नै नसकिने भएको भन्दै अहिलेको सरकार काम गर्नेभन्दा पनि बोल्ने मात्र रहेको बताए । जनताको पीडा सम्बोधन र समाधानमा सरकार इमानदारीका साथ नलागेको उनको आरोप छ । विपद्मा पनि सरकार नदेखिएको र जनप्रतिनिधि निवास, सरकारी भवन निर्माणमा नै केन्द्रित रहेको उनको भनाइ थियो । 

पोखरा क्षेत्रीय अन्तर्राष्ट्रिय विमानस्थललगायत १६ वटा विमानस्थल, भ्युटावर, गाउँपालिका–नगरपालिका र वडाका भवन, पालिकाभित्रका अस्पताललगायतमा अनावश्यक लगानी भएको उनले बताएका छन् । समाजवादी यात्रा गर्दा राोजगारी, सुशासन, उत्पादन, देशका परियोजना विचार पुर्याइ तय गर्ने, बजारको व्यवस्थापन र मूल्यांकन गर्ने बताउँदै नेपालले माओवादीसँग एकताको सम्भावना रहेको र एमालेसँग कल्पना नै गर्न नसकिने बताए । 

सहकारीपीडितका मुद्दालाई तत्काल सम्बोधन गर्नुपर्ने उनले बताए । नजिकिँदै गरेको उपनिर्वाचनमा पनि समाजवादी एक्लै चुनाव लड्ने र यसका लागि उम्मेदवार तयार भएको उनले बताए । दसौँ महाधिवेशनपछि पार्टी नयाँ सोचबाट अघि बढाउदै आएको भन्दै उनले निर्वाचनले कतिपयलाई समेट्न नसकिएको बताए । पार्टीको प्रदेश अधिवेशनको तयारी भएको र जिल्लाको पनि क्रमश गर्दै जाने उनको भनाइ छ ।