स्थानीय तहको उपनिर्वाचन र उम्मेदवार चयनबारे कांग्रेसमा आज छलफल

२१ कात्तिक, काठमाडौं । नेपाली कांग्रेसले आगामी मंसिर १६ गते हुने स्थानीय तहको उपनिर्वाचन र उम्मेदवार चयनबारे आज छलफल गर्दैछ । कांग्रेसको स्थानीय तह उपनिर्वाचन केन्द्रीय संयोजन समितिले निर्वाचनबारे छलफल गर्न लागेको हो । 

पार्टी कार्यालय सानेपामा बुधबार दिउँसो ३ बजे छलफलका लागि बैठक डाकिएको समिति सदस्य जीवन परियारले नेपालबहसलाई जानकारी दिए । महामन्त्री विश्वप्रकाश शर्माको नेतृत्वमा यो समिति बनाइएको छ । स्थानीय तह उपनिर्वाचन हुने वडा तथा पालिकाहरूको स्थिति र उम्मेदवारकाबारे छलफल हुने परियारले बताए । 
 
यहीँ मङ्सिर १६ गते स्थानीय तहको उपनिर्वाचन मिति घोषणा भएको छ । जसको तयारीमा दलहरू लागेका छन् । कांग्रेसमा अहिलेसम्म कीर्तिपुर नगरपालिकाको प्रमुख पदका लागि ११ जना सिफारिस भएका छन । सिफारिस हुनेमा क्रमशः कृष्णमान डंगोल, बद्रीलाल महर्जन, हिमाल कार्की, जमुना नकर्मी, संगीता बोगटी, सशिर महर्जन, जनकलाल महर्जन, राममान सिंह, मीनप्रकाश महर्जन, किरण केसी र सचिन्द्र महर्जन छन् ।