उपनिर्वाचनका उम्मेदवारहरुलाई सघाउन र सहजीकरण गर्न कांग्रेसका १० नेताले पाए जिम्मेवारी

२२ कात्तिक, काठमाडौं । नेपाली कांग्रेसले उपनिर्वाचनका उम्मेदवारलाई सघाउन र निर्वाचन सहजीकरण गर्ने जिम्मा १० नेतालाई दिएको छ । कांग्रेस मुख्यसचिव कृष्णप्रसाद पौडेलले दिएको जानकारी अनुसार सहमहामन्त्रीसहित १० जना नेताहरूलाई मंसिर १६ गते हुने स्थानीय तह उपनिर्वाचनमा आवश्यक समन्वय र सहजीकरण गर्ने जिम्मेवारी तोकिएको हो । 

सभापति शेरबहादुर देउवाले महामन्त्री विश्वप्रकाश शर्माको  नेतृत्वमा स्थानीय तह उपनिर्वाचन केन्द्रीय संयोजन समिति गठन गरेका थिए । सो समितिले १० जना नेताहरूलाई प्रदेश, जिल्ला र स्थानीय कार्यसमितिसँग आवश्यक समन्वय र सहजीकरणको जिम्मा दिएको हो ।

प्रवक्ता प्रकाशशरण महतले अन्तर पार्टी समन्वय गर्नेछन् भने केन्द्रीय सदस्य पुष्पा भुसालले लुम्बिनी प्रदेश एवं निर्वाचन आयोग समन्वय गर्ने भएकी छन् । केन्द्रीय सदस्य मीन विश्वकर्माले प्रचार प्रसार संयोजन, केन्द्रीय सदस्य मधु आचार्यले स्थानीय तह समन्वय र केन्द्रीय सदस्य नानु बास्तोलालाई सचिवालय व्यवस्थापनको जिम्मेवारी दिइएको छ । 

सहमहामन्त्री महालक्ष्मी उपाध्याय ‘डिना’ ले बागमती प्रदेश, सहमहामन्त्री भीष्मराज आङ्दम्बेले कोशी प्रदेश, सहमहामन्त्री महेन्द्र यादवले मधेस प्रदेश, सहमहामन्त्री जीवन परियारले कर्णाली प्रदेश र गण्डकी प्रदेश र केन्द्रीय सदस्य एनपी साउदले  सुदूरपश्चिम प्रदेश कार्यसमितिसँग आवश्यक समन्वय र  सहजीकरण गर्नेछन् ।

महामन्त्री शर्मा नेतृत्वमा सानेपामा बुधबार बसेको बैठकले उपनिर्वाचनमा पार्टीका उम्मेदवारहरूलाई विजयी गराउन सम्पूर्ण एकता र गाम्भीर्यतालाई लाग्ने निर्णय गरेको थियो । मंसिर १६ गते स्थानीय तहका ४४ पदमा उपनिर्वाचन हुँदैछ । कांग्रेसले उम्मेदवारहरू सिफारिस गर्न सुरू गरिसकेको छ ।

जिल्ला समन्वय समितिका प्रमुख दुई, गाउँपालिका अध्यक्ष दुई, उपाध्यक्ष चार, नगरपालिका प्रमुख एक, उपप्रमुख एक र वडाध्यक्ष ३४ गरी जम्मा ४४ रिक्त पदका लागि उपनिर्वाचन हुनेछ । कांग्रेसले उपनिर्वाचनमा गठबन्धन नगर्ने बताएको छ । अहिले सिफारिस भएर आएकाबाट उम्मेदवारहरू छान्ने काम सुरु भएको छ ।