सहकारी ठगीमा रविको इन्कारी बयान, रकम कसले र कसरी लग्यो मलाई थाहा छैन !

२८ कात्तिक, रुपन्देही । रास्वपा सभापति तथा पूर्वगृहमन्त्री रवि लामिछानेले सहकारीको रकम अपचलनमा आफ्नो संलग्नता नरहेको भन्दै इन्कारी बयान दिएका छन् । सहकारी ठगीमा अनुसन्धानका लागि बयान लिन कास्कीबाट भैरहवा ल्याइएका लामिछानेले बयानमा आफ्नो संलग्नता अस्वीकार गरका छन् । 

सहकारीबाट आफ्नो नाममा गएको रकम कसले र कसरी लग्यो भन्नेबारे आफूलाई जानकारी नरहेको लामिछानेले बयानका क्रममा बताएका छन् । उनले आफूले सहकारीबाट रकम नलगेको र कसैलाई त्यस्तो आग्रह वा निर्देशनसमेत नदिएको जवाफ दिएको अनुसन्धानमा संलग्न स्रोतले जनाएको छ ।

 बयान सकेर फर्किेन क्रममा सरकारी वकिल कार्यालय बाहिर  लामिछानेले बाघलाई थुनेर स्याल हुँदैन भनेर अभिव्यक्ति दिएका थिए।  मंगललवारको बयानमा सहकारी रकम हिनामिनामा आफ्नो संलग्नता अस्वीकार गरेका लामिछानेसँग जिल्ला सरकारी वकिल कार्यालयले आज बुधवार पनि बयान लिने भएको छ । मंगलवार मौखिक प्रश्न सोधिएको उनलाई आज भने लिखित प्रश्न सोधिने भएको छ ।

जिल्ला सरकारी वकिल कार्यालयका न्यायाधिवक्ता प्रेमराज पौडेलसहितको टोलीले मङ्गलवार २० भन्दा बढी प्रश्न सोधिएको अधिकांश प्रश्नमा इन्कारी बयान दिएका थिए । आज बुधवार बिहान सवा १० बजेदेखि नै बयान निरन्तर हुने जनाइएको छ । 

मंगलबार साढे १२ बजे सुरु भएको बयान साँझ ६ बजे सकिएको थियो । आज सवा १० बजे छामिछानेको बयान लिइने जिल्ला प्रहरी कार्यालय रुपन्देहीले जनाएको छ ।  लामिछानेसँगको बयानमा इलाका प्रहरी कार्यालय बुटवलका डीएसपी विजय पण्डित, जिल्ला न्यायाधिवक्ता प्रेमराज पौडेलसहित केही अनुसन्धान अधिकृत सामेल थिए । मंगलवार सामान्य सोधपुछ भए पनि लिखित सोधपुछ बुधवार हुने भएको छ । 

बुटवलस्थित सुप्रिम बचत तथा ऋण सहकारी संस्थाको १४ करोड २९ लाख रुपैयाँ गोरखा मिडिया नेटवर्क प्रालिमा लगेर खर्च गरेको भन्दै लामिछानेविरुद्ध सङ्गठित ठगी गरेको आरोपमा अनुसन्धान भइरहेको छ ।