रौटहटमा पनि तस्करी चालु ! घुमुवा फिरोजको आतंक

रौतहट । तस्करीको अखडाका रूपमा चिनिँदै आएको रौतहटमा यतिबेला तस्करहरूले घुमुवा प्रयोग गरेर अनुकूलको समयमा तस्करी धन्दा शुरु गरेका छन् ।

एसपी भूपेन्द्र खत्रीका घुमुवा हवल्दार फिरोज खाँलाई मिलाएर तस्करहरूले लाइन चलाइरहेका छन् । रौतहटमा लामो समयदेखि बसी बदनामी कमाएका प्रहरीका घुमुवा हुन् । कपडाको तस्करीमा संलग्न सञ्जय साह, कपडा तथा मरिचको तस्करीमा संलग्न उमाशंकर जयसवाल, कन्हैया, कपडा एवम् खैनीको तस्करीमा संलग्न लक्ष्मी साह, स्टिल तथा विद्युतीय सामानको तस्करीमा संलग्न राम जैद, हार्डवेयरको तस्करीमा संलग्न श्यामसुन्दर, मरिचको तस्करीमा संलग्न मुखिम एवम् कपडा र चल्लाको तस्करीमा संलग्न राजीव र मनोजसँग घुमुवा हवल्दार खाँको नजिकको सम्बन्ध रहेको छ ।

यी तस्करहरूले रौतहटको सुनरमिया, बेलबिछिया, बंकुल नाकाहरूलाई प्रयोग गरी तस्करी गर्दै आइरहेका छन् । केही महिनाअघिमात्रै काठमाडौँबाट गौर चल्ने दुईवटा रात्रिकालीन बसको भाइबर (बसको अगाडिको भाग) मा तस्करीको सुन ल्याउने क्रममा पक्राउ परेको थियो । एक किलो ७ सय ९० ग्राम उक्त सुनमा नाम जोडिएपछि रौतहटमा लामो समयदेखि घुमुवा बसेका राजमंगल सिंह वीरगञ्ज पुगेका छन् तर सँगै रहेका फिरोज खाँ भने अहिलेसम्म पनि रौतहटको घुमुवाका रूपमा परिचालित छन् ।

एसपी भूपेन्द्र खत्रीले तस्करी रोक्ने र तस्करीमा संलग्न भएका खण्डमा मातहतका जोकोही प्रहरीलाई पनि कारवाही गर्ने बताईरहदाँ हवल्दार फिरोज खाँले एसपीको निर्देशन लत्याएर तस्करहरूलाई एक्लै लाइन दिए भनी पत्याउने आधार भने छैन् । घुमुवा फिरोज खाँलाई २ नम्बर प्रदेश प्रहरीका उच्च अधिकृतको समेत संरक्षण रहेको जिप्रकाका प्रहरीहरू बताउँछन् । – जगन्नाथ सोनीबाट