विभिन्न समूहको प्रदर्शनले आज अस्तब्यस्त बन्दै काठमाडौं, ५ हजार प्रहरी र ५ सय ट्राफिक खटाइने

७ मंसिर, काठमाडौं । सरकारको नेतृत्व गरिहेको नेकपा एमाले सहित विभिन्न समूहको प्रदर्शनले गर्दा आज शुक्रबार काठमाडौंको ट्राफिक जाम अस्तब्यस्त हुने देखिएको छ । काठमाडौंका विभिन्न तीन ठाउँमा विभिन्न समूहले प्रदर्शन राखेका छन् । 

काठमाडौंका प्रमुख जिल्ला अधिकारी जयनारायण आचार्यले तीन ठाउँमा प्रदर्शन हुन लागेकाले आम नागरिकको जनजीवन सहज र सुरक्षित बनाउन शुक्रबार ५ हजार भन्दा बढी प्रहरी खटाइने बताएका छन् । ट्राफिक व्यवस्थापन सहज बनाउन ५ सयभन्दा बढी ट्राफिक प्रहरी खटाइने भएको छ । 

माइतीघरमा केही दिन अघिदेखि नै सहकारी पीडितहरूको प्रदर्शन जारी छ । शुक्रबार एमाले र मेडिकल व्यवसायी दुर्गा प्रसाईँ समूहले काठमाडौंमै प्रदर्शन गर्दैछन् । एमालेले दरबारमार्गमा गर्ने जागरण सभाका लागि भद्रकालीबाट जुलुश निकालेर सुन्धारा, वीर अस्पताल, रत्नपार्क घन्टाघर हुँदै दरबारमार्ग पुग्ने कार्यतालिका बनाएको छ । 

दुर्गा प्रसाईँ समूहको प्रदर्शन कोटेश्वरमा हुँदैछ । एकैदिन तीन ठाउँमा फरक फरक समूहको प्रदर्शन हुने भएपछि शुक्रबार काठमाडौंको सुरक्षा व्यवस्था कडा पारिएको छ ।  सुरक्षा संवेदनशीलता र यातायातलाई मध्येनजर गरेर नै प्रदर्शन गर्ने ठाउँको दूरी टाढा बनाइएको प्रशासनले जानकारी दिएको छ ।