दुई वर्षपछि क्यानाडाबाट नेपाल फर्किए, घर नपुगी होटलमै पासो लगाएर आत्महत्या गरे

९ मंसिर, काठमाडौं । शनिबार क्यानाडाबाट नेपाल फर्किएको एक जोडी काठमाडौँको सिनामंगलको एक होटलमा मृत भेटिएका छन् । काठमाडौँ महानगरापलिका ८ सिनामंगलस्थित होटल जन्मभूमिमा सुनसरीका ३४ वर्षीय रमेश रायमाझी र मोरङकी २९ वर्षीय शर्मिला माझी मृत भेटिएका हुन् । प्रहरीले उनीहरुको मृत्युबारे अनुसन्धान सुरु गरेको छ । 

काठमाडौं परिसरका एसपी तथा प्रवक्रा नवराज अधिकारीका अनुसार उनीहरू हिजो शनिबार मात्रै क्यानडाबाट फर्केको खुलेको छ । सन् २०२२ मा क्यानडा गएका उनीहरू २ वर्षपछि काठमाडौं फर्किएका थिए । उनीहरू सिनामंगलस्थित जन्मभूमि होटलको बरण्डाको रेलिङमा कपडाको पासो लगाएर झुण्डिएको अवस्थामा मृत भेटिएका हुन् । 

होटलमा बसेका उनीहरू पासो लगाएर झुण्डिएको अवस्थामा भेटिएकाले केही पारिवारिक कारण आत्महत्या गरेको हुनसक्ने प्रहरीले आशंका गरेको छ । प्रहरीका अनुसार होटलको बरण्डाको रेलिङमा सेतो रङको कपडाको सलले घाँटीमा पासो लगाएको अवस्थामा उनीहरुको शव भेटिएको हो । सो घटनाबारे अनुसन्धान जारी रहेको प्रहरीले जनाएको छ ।

थप अनुसन्धानका लागि जिल्ला प्रहरी परिसर काठमाडौँ र उपत्यका अपराध अनुसन्धान कार्यालयको प्रहरी टोली अहिले घटनास्थलमा पुगेको समेत जनाइएको छ ।  होटलको चौथो तलाको कोठमा नम्बर १२० भाडामा लिएर उनीहरु बसेका थिए ।