साइवर अपराधमा समातिएका प्रसाईंको धम्की र असुलीतिर मोडियो अनुसन्धान

१५ मंसिर, काठमाडौं । मेडिकल व्यवसायीका रुपमा चिनिएका झापाका दुर्गा प्रसाईं यतिबेला प्रहरीको हिरासतमा छन् । साइबर अपराधको सिलसिलामा उनमाथि अनुसन्धान गरिरहेको प्रहरी उनको समूह नै आपराधिक क्रियाकलापमा संलग्न भएको निष्कर्षतिर पुगेको छ । मेडिकल व्यवसाय देखाएर प्रसाईंले धम्की र असुली जस्ता काम गरिरहेको तर्फ प्रहरीको अनुसन्धान मोडिएको छ । उनले भारतीय अपराधी समुह लरेन्स बिस्नोईका नामबाट नेपालमा धम्की दिने र असुल गर्ने समूह नै बनाएको आशंका छ । 

प्रसाईंको निर्देशन अनुसार व्यवसायी र पेशाकर्मीलाई धम्की दिएको आरोपमा पक्राउ परेका झापाका अर्का व्यक्ति बैंकिङ कसुरका आरोपी रहेको प्रहरीको भनाई छ । प्रसाईंका सहयोगी झापा चारआलीका ३६ वर्षीय नविन प्रधान भनिने हरिचन्द्र फुयाँललाई पक्राउ गरेपछि प्रहरी प्रसाईं अपराधिक समूहसँग आवद्ध रहेको निष्कर्षमा पुगेको हो । साइबर अपराधमा अनुसन्धानमा रहेका प्रसाईंले भारतीय आपराधिक समूह लरेन्स बिस्नोईका नाममा सहयोगीमार्फत बैंकर र व्यवसायीलाई धम्की दिने गरेको खुलेको हो । 

उद्योगी र बैंकरलगायतलाई फोनमार्फत ज्यान मार्ने धम्की दिएको आरोपमा पक्राउ परेका व्यक्तिले नै प्रसाईंको निर्देशनमा उक्त काम गरेको प्रहरीसमक्ष बयान दिएको खुलेको छ । अहिले प्रहरीको केन्द्रीय अनुसन्धान ब्यूरो (सीआईबी) ले आपराधिक लाभ, किर्ते, बैंकिङ कसुर, संगठित अपराध, सम्पत्ति शुद्धीकरण जस्ता विषयमा अनुसन्धान गरिरहेको छ । सीआईबी उच्च स्रोतका अनुसार  भण्डै ६ अर्ब भन्दा बढी कर्जा लिएका उनले बैंकका सञ्चालक र सीईओलाई थर्काउने काम समूह मार्फत गराइरहेका छन् । अनुसन्धानकै क्रममा प्रसाईं र उनका नातेदारका नाममा विभिन्न देशबाट सन् २०२३ यता साढे १० करोड भन्दा विदेशी मुद्रा भित्रिएको भेटिएको छ । 

आपराधिक गतिविधि गरेको आरोपमा बुधबार झापामा पक्राउ गरी काठमाडौं ल्याएका फुँयालले प्रसाईंको निर्देशनमा लरेन्स बिस्नोई समूहको सदस्य हुँ भन्दै बैंकर र व्यवसायीलाई फोनमार्फत धम्की दिएको स्वीकार गरेको प्रहरीको भनाई छ । सीआईबीका प्रवक्ता एसपी होबिन्द्र बोगटीले  फुँयालले भारतका आसाम र पानीट्यांकी क्षेत्रमा पुगेर धम्की दिने गरेको भेटिएको बताएका छन् । व्यापारी र बैंकरलाई धम्कीपूर्ण फोन भारत र यूएईका नम्बरबाट आउने गरेको र फोन कलमार्फत अपरिचित व्यक्तिले सहयोग माग्ने र नदिए ज्यान मार्नेसम्मको धम्की दिने प्रसाई समूहबाट फुँयालले गर्दे आएका थिए ।

सीआईबीका अनुसार हालसम्म चार जना व्यवसायीले प्रसाईंविरुद्ध उजुरी दिएका छन् । भारतबाट फुयाँलले विभिन्न व्यवसायी, पेशाकर्मी लगायतलाई ११३ पटक फोन गरेको कल डिटेल रेकर्ड (सीडीआर) बाट  फेला पारिएको छ । धम्की कलका लागि फुयाललाई प्रसाईंले पाँच लाख दिएको पनि प्रहरी अनुसन्धानबाट खुलेको छ । प्रहरीका अनुसार उक्त तथ्य फुयालको मोबाइलमा भेटिएको भौचरबाट खुलेको हो ।   सीआईबीका अनुसार प्रसाईं र फुयालबीच पुरानै चिनजान हो । फुयाल यसअगाडि विभिन्न कसुरमा संलग्न थिए ।