कोशी कांग्रेसमा फेरी किचलोः शेखर पक्षको भेला रोक्ने दवावस्वरुप सानेपाबाट जिल्लामा गयो पत्र

१७ मंसिर, काठमाडौं । नेपाली कांग्रेसभित्र कोशीमा प्रदेश समितिको भेलालाई लिएर आन्तरिक कलह सुरु भएको छ । यसले पार्टी सभापति शेरबहादुर देउवा र वरिष्ठ नेता डा. शेखर कोइरालाका बीचमा केही समयदेखि सुधारिएको सम्बन्धमा खटपट देखिएको छ । कांग्रेसले कोशी प्रदेशमा यही मंसिर २२ गते प्रथम प्रदेश सम्मेलन आयोजना गर्ने कार्यक्रम राखेको छ । यसअघि नेता कोइरालाले आफू पक्षका नेता र प्रतिनिधिसँग छलफल राखेका छन् । 

यस विषयलाई लिएर कांग्रेस पार्टी कार्यालयबाट प्रदेशका जिल्ला समितिहरुलाई पत्र नै पठाइएको छ । पत्रमा कोइरालाले गर्न लागेको आफू पक्षीय भेला पार्टीको नभएको दावी गरिएको छ । कोइराला पक्षले १८ गते मंगलबार विराटनगर निवासमै राखेको छलफललाई सानेपाले वैधानिक भेला मान्न अस्वीकार गरेको छ । कोशी प्रदेश समितिका संस्थापन पक्षका पदाधिकारीले केन्द्रीय कार्यालयमा सम्पर्क गरेर कोइराला पक्षको भेला रोक्न पत्र लेख्न भनेपछि कांग्रेसका मुख्यसचिव कृष्णप्रसाद पौडेलले पत्र पठाएका हुन् ।  

पार्टीको प्रदेश समितिले मंसिर २२ मा गर्न लागेको पहिलो प्रदेश सम्मेलनको सम्मुखमा कोइराला पक्षले आफू पक्षका नेता प्रतिनिधिसँग छलफल गर्न भेला बोलाएको हो । यो भेला केही समय अगाडि नै कोइरालाले तय गरेका थिए । कोइरालाले ४ दिनअघि भेला बोलाएपछि पार्टी केन्द्रले कोशीमा सर्कुलर पठाएर सो भेलामा नजान दवाव दिएको छ । कोशीमा प्रदेश समितिले मंसिर २२ गते प्रथम प्रदेश सम्मेलन गर्दैछ । यसरी कांग्रेस कोशीमा चर्केको गुटगत विवादले कोइराला र सभापति देउवा बीच पनि दूरी बढाएको छ । 
 
मुख्यसचिव पौडेलले कोशी प्रदेशका सबै जिल्लाहरूलाई परिपत्र गर्दै २२ मंसिर अघि पार्टीको औपचारिक कार्यक्रम नभएको बताएका छन् । पार्टीको औपचारिक निर्णयमा २२ मंसिरमा प्रदेश सम्मेलन डाकिएको छ । मंसिर २२ पूर्व कोशी प्रदेश स्तरीय पालिका सभापतिहरूको भेला भनि प्रचारित कार्यक्रममा सहभागी हुनुपर्ने/नपर्ने स्पष्टताका लागि जिल्लाहरूबाट केन्द्रमा सम्पर्क गरिएकाले, मंसिर २२ मा हुने सम्मेलन पूर्व प्रदेश स्तरीय पार्टीको कुनै पनि कार्यक्रम नरहेको जानकारी गराइन्छ,’ मुख्य सचिव कृष्णप्रसाद पौडेलले जारी गरेको सर्कुलरमा भनिएको छ ।