नेपालमा अर्को व्यवस्था सम्भव छैन, गणतन्त्रलाई नै सुधारेर राम्रो बनाउनुपर्छः देउवा

१६ पुष, काठमाडौं । नेपाली कांग्रेसका सभापति शेरबहादुर देउवाले नेपालमा गण्तन्त्रभन्दा अर्को व्यवस्था सम्भव नभएको भन्दै यही व्यवस्थालाई सुधारेर जनहितमा बनाउनु बुद्धिमानी हुने बताएका छन् । उनले गणतान्त्रिक व्यवस्था स्थायी भएको भन्दै यसलाई सुदृढ गर्दै जानुपर्ने कुरामा दुइमत नरहेको बताएका छन् । 

राष्ट्रिय एकता तथा मेलमिलाप दिवसका अवसरमा मंगलबार काठमाडौँमा आयोजित कार्यक्रममा बोल्दै उनले गणतन्त्रलाई सफल पार्न सबैको कर्तव्य हुने भएको बताए । आजको गणतन्त्र सफल पार्न सबैको कर्तव्य छ । गणतन्त्रलाई सुदृढ बनाउनु पर्छ । यसलाई अगाडि लानु पर्छ । अहिलेका मधेश पहाड हिमाल पूर्व पश्चिम सम्पूर्ण नेपालीको एकता यही मेलमिलाप हो उनले भने  ।
 
उनले मेलमिलाप नीति नेपाली कांग्रेसका लागि मात्र नभई देशक लागि आवश्यक भएको बताए । ‘कांग्रेसका लागि मात्र होइन, देशभरका लागि राष्ट्रिय मेलमिलाप आवश्यक छ, कांग्रेसले अग्रसरता लिनुपर्छ । बिपी गणेशमान नेपाल फर्केपछि राजनीति पनि उनीहरू वरपर घुमेको र राजाले घुँडा टेकेको उनले बताए । उनले बिपी कोइराला र गणेशमान सिंह राष्ट्रिय मेलमिलापको नीति लिएर २०३३ सालमा नेपाल फर्किएको पनि बताए। सोही दिनलाई कांग्रेसले राष्ट्रिय मेलमिलाप दिवसका रूपमा बनाउँदै आएको छ ।

त्यसबेला खतरा र चुनौतीसहित बिपी र गणेशमान स्वदेश फर्किएको सभापति देउवाको भनाइ छ । ‘२०३३ सालमा बिपी कोइराला र गणेशमान सिंह राष्ट्रिय मेलमिलापको नीति लिएर फर्कनुभएको थियो । यद्यपि नेपालमा राजाले मारिदिन्छन् कि के हुन्छ, हत्या हुन्छ कि भन्ने अवस्थामा पनि उहाँहरू आउनुभएको थियो,’ सभापति देउवाले भने, ‘भारतमा रहेका उहाँहरूलाई नेपालको सीमा क्षेत्रमा पनि आउन दिएका थिएनन् । त्यसकारण नेपालमै फर्किन उहाँहरूले जोड गर्नुभएको थियो । ठूलो खतरा र चुनौती राखेर उहाँहरू नेपाल फर्किएको हो ।’

सभापति देउवाका अनुसार बिपी र गणेशमान नेपाल फर्किएपछि उनीहरूकै वरपरि राजनीति केन्द्रित हुँदै गएको पनि बताए। केही वर्षपछि बिपी कोइरालाको निधन भएको र सर्वोच्च नेता गणेशमान सिंहको नेतृत्वमा काठमाडौंमा भएको आन्दोलनले प्रजातन्त्र पुनस्र्थापना गरेको सभापति देउवाले बताए । ‘गणेशमान सिंहको नेतृत्वमा काठमाडौंमा भएको आन्दोलनले राजाले घुँडा नै टेके,’ देउवाले भने ।