नेपाललाई हिन्दू अधिराज्य बनाउने विषयमा दिल्लीमा बहस

१६ पुष, दिल्ली । विश्व हिन्दु महासंघ अन्तर्राष्ट्रियका अध्यक्ष अस्मिता भण्डारीलाई भारतको नयाँ दिल्लीमा स्वागत एवम् सम्मान गरिएको छ ।  विश्व हिन्दु महासंघ भारत च्याप्टरका अध्यक्ष  एवम् अन्तर्राष्ट्रियका उपाध्यक्ष महन्त सुरेन्द्रनाथ अवधूत लगायतका सन्त महन्त एवम् भारत च्याप्टर भण्डारीलाई अन्तर्राष्ट्रिय अध्यक्ष भए पश्चात् बधाई एवं सम्मान गरिएको छ । 

विश्व हिन्दु महासंघको ४४ बर्से इतिहासमा उनी पहिलो महिला अध्यक्ष बन्नु भएकी हुन् । अध्यक्ष बनेपछि विश्व हिन्दु महासंघ भारतका अध्यक्ष एवम् अन्तर्राष्ट्रिय उपाध्यक्ष महन्त सुरेन्द्रनाथ अवधूतको  निमन्त्रणामा उहाँ एक साता लामो भारत भ्रमणमा गएकी हुन् । महन्त सुरेन्द्रनाथजीले यसै साता उत्तर प्रदेशका मुख्यमन्त्री योगी आदित्यनाथलाई लखनउमा भेट गरे, लखनउबाट फर्किए लगत्तै अध्यक्ष भण्डारीलाई भारत भ्रमणमा बोलाइएको हो ।

महासंघका पदाधिकारीहरु, राष्ट्रिय स्वयंसेवक संघका प्रचारकहरु, भारतीय जनता पार्टीका केही नेताहरु र हिन्दुवादी उच्च पदस्थ ब्यक्तित्वहरुले भण्डारीलाई स्वागत गरे । यसपटक अध्यक्ष भण्डारीले हिन्दुबादी नेता एवम् भारतीय जनता पार्टीका नेताहरूसँग भेट गर्ने कार्यक्रम रहेको  विश्व हिन्दु महासंघ भारतका महामन्त्रीले जानकारी दिए । 

नेपालमा राजा सहितको हिन्दु राष्ट्रको पक्षमा विश्व हिन्दु महासंघले वकालत गर्दै आएको छ । दिल्लीमा सम्पन्न कार्यक्रममा अध्यक्ष भण्डारीले भनिन्, नेपाल संसारको एक मात्रै हिन्दु अधिराज्य हो , जहाँ ८१% भन्दा धेरै हिन्दु धर्मावलम्बीको बसोबास रहेको छ  ।

संसारमा धेरै कृश्चियन  देश छन्, ईस्लामिक देश छन् भने नेपाल हिन्दु अधिराज्य किन हुन सक्दैन ? विश्व हिन्दु महासंघको अबको एक मात्रै उद्देश्य रहेको छ। त्यो भनेको नेपाललाई पुनः हिन्दु अधिराज्य बजाउने । यो धेरै चुनौती पूर्ण छ । त्यसका लागि भारतको मद्दत अनिवार्य छ । 

नेपाललाई हिन्दु अधिराज्य पुर्नस्थापना गर्ने मुख्य एजेन्डा यसपटक महासंघको ११ ओैं महाधिवेशनबाट पास गरिएको छ । सो कार्य पूरा गर्न नेपाल – भारतको हिन्दु समाज एक  भएर काम गर्ने महासंघको योजना रहेको छ ।

अध्यक्ष भण्डारीले हिन्दु राष्ट्र र राजसंस्थाको बारेमा भारतीय हिन्दु नेताहरुसँग छलफल गर्ने बुझिएको छ । योगी आदित्यनाथ र राजा ज्ञानेन्द्र बिचको सूत्रधारका रुपमा काम गर्दै आएकी भण्डारीलाई अध्यक्ष बनाउन दक्षिणको भूमिका प्रमुख रहेको महामण्डलेश्वर आत्मानन्द गिरीले सार्वजनिक कार्यक्रममा भने ।  

गिरीका अनुसार विश्व हिन्दु महासंघको अधिवेशनमा हिमाली  या पहाडी मूलका साधु सन्तहरुलाई सहभागी गराइएन भारतको रणनीति अनुसार  महाधिवेशन सम्पन्न भयो । योगी आदित्यनाथले भारतका प्रत्येक स्टेटका प्रतिनिधिहरुलाई जनकपुर सम्मेलनमा भागलिन पठाए । भारत उत्तर प्रदेशका अध्यक्ष भिखारी प्रजापति र राष्ट्रिय महामन्त्री योगी राजकुमारनाथ योगी आदित्यनाथको प्रतिनिधिका रुपमा जनकपुर आएका थिए । 

हाल पूर्वराजा ज्ञानेन्द्र लखनउको १० दिने भ्रमणमा रहेका छन् । लखनउमा उनले उत्तरप्रदेशका मुख्य मन्त्री योगी आदित्यनाथ जीसँग भेटघाट गर्ने कार्यक्रम छ । यसै समयमा अध्यक्ष भण्डारी दिल्ली भ्रमणमा रहेकी छन् ।  नेपाल र भारतको  सांस्कृतिक सम्वन्धलाई अझै प्रगाढ बनाउन बिश्व हिन्दु महासंघको भूमिका महत्त्वपूर्ण हुने महन्त सुरेन्द्र नाथले बताए ।